16 желтоқсан күні аты аңызға айналған опера әншісі, актриса, педагог, Қазақстанның халық әртісі, «Отан» орденінің иегері Бибігүл Төлегенова туған күнін атап өтті. Биыл өнер саңлағы 95 жасқа толып отыр.
Осы айтулы күнде Алматы қаласының әкімі Ерболат Досаев Бибігүл Ахметқызының шаңырағына арнайы барып, президент Қасым-Жомарт Тоқаевтың құттықтау хатын жеткізді.
Президент хатында Бибігүл Төлегенованың ұлттық мәдениеттің дамуына қосқан өлшеусіз үлесін атап өтіп, оның өнері елдің мақтанышына айналғанын және жас ұрпаққа шабыт беретінін айтты.
«Ұзақ жылғы жемісті шығармашылық жолыңыз сізді абырой биігіне көтерді. Еліміздің алтын қорына мол мұра қалдырдыңыз. Өнегелі де өнерлі шәкірттер тәрбиелеп шығардыңыз. Ерен еңбегіңіздің жоғары мемлекеттік наградалармен, мәртебелі атақтармен және айрықша сыйлықтармен аталып өтуі – зор мерей», – деп жазылған Президенттің құттықтау хатында.
Сонымен қатар, Бибігүл Төлегенованың мерейтойына орай 21 желтоқсан күні Алматыда сағат 15:00-де Республика Сарайында салтанатты концерт өтеді.
Бұған дейін, Бибігүл Төлегенованың мерейтойына арналған концерт 15 желтоқсан күні Астана қаласында өткен болатын.
