Қазақстанның жылу энергетика саласын дамытуға 8 трлн теңгеден астам инвестиция тартылады. Бұл туралы Энергетика министрлігінің есебінде жазылған.
Министрлік елдің энергетика саласын дамытуға бағытталған жобаларға 720 млрд теңгеге аукциондық сауда-саттық өткенін, бұл жобалардың жақын арады іске қосылатынын хабарлады.
«Өткізілген аукциондық сауда-саттықтың және «ЖЭК бойынша РФО» ЖШС-мен жасалған шарттардың қорытындысы бойынша жиынтық қуаты 1 682,4 МВт 66 ЖЭК жобасын пайдалануға беру жоспарлануда. Тартылған инвестициялар сомасы шамамен 720 млрд теңгені құрайды», – делінген баспасөз хабарламасында.
Бұл қаражатқа:
- Қуаты 311,11 МВт болатын 34 гидроэлектростанция нысаны:
- Қуаты 1 110 МВт жел электр станцияларының 20 объектісі;
- Күн электр станцияларының 9 нысаны 250 МВТ;
- Қуаты 11,35 МВт биогаз электр станцияларының 3 объектісі пайдалануға берілмекші.
Бұдан бөлек 2027 жылы министрлік қуаты 4 500 МВт-тан астам ЖЭК генерациясын салу бойынша аукциондық сауда-саттық өткізу жоспарланған. Сондай-ақ Энергетика министрлігі Қытай Халық Республикасымен ЖЭК саласындағы жобаларды іске асыру жөніндегі үкіметаралық келісімге қол қойған. Қытай компаниясы жалпы қуаты 1,8 ГВт ЖЭК объектілерін салу жоспарланып отыр. Қазақстан тарапы бұл келісім контурына қосымша ЖЭК жобаларын енгізе алады.
Жалпы елдің энергетика саласына тартылатын инвестициялар көлемі алдағы 5 жылда яғни 2029 жылға дейін 8 трлн теңгеге жетуі мүмкін.
«Үкіметаралық келісім шеңберінде стратегиялық инвесторлардың қатысуымен қуаты 2 ГВт ауқымды жобаларды пысықтау жүргізілуде», – делінген хабарламада.
2029 жылы Катар инвесторлары Қызылорда облысында қуаты 1100 МВт бу-газ қондырғысының құрылысын аяқтайды. Ал Ресей инвесторлары Көкшетау, Семей және Өскемен қалаларында көмір генерациясы базасында жаңа жылу электр орталықтарын салады. Бұл үш қалада салынатын ЖЭО-лар 2028-2030 жылдары пайдалануға берілмеші.
Сонымен қатар министрлік Қазақстанның ұлттық электр желісін дамыту жұмыстары жалғасып жатқанын хабарлады.
«Батыс Қазақстан энергожолы-Атырау – Маңғыстау» бағыты бойынша ұзындығы 780 км 220 кВ электр беру желісі (ЭБЖ) салынды. Бұл қадам электр қуатының өткізу қабілеті мен сенімділігін арттыруға бағытталған.Келесі қадам ретінде 2028 жылдың соңына дейін батыс аймақтың электр желілерін бірыңғай электр энергетикалық жүйемен біріктіру жобасы іске асырылады», – делінген баспасөз хабарламасында.
