Қазақстандықтар арасында пәтерді жалға беру арқылы табыс табу өте танымал. Халық қолда бар қаржысына пәтер сатып алып, оны жалға беріп қойғанды жөн көреді. Алайда мұндай инвестиция шынымен тиімді ме? Krisha.kz сарапшылары бұл сұраққа жауап іздеп, әртүрлі қалалардағы пәтерлердің өзін-өзі ақтау мерзімін есептеді.
Жалға беру пәтер құнын қанша уақытта ақтайды?
Сарапшылар зерттеуге 35 шаршы метрлік бір бөлмелі пәтердің орташа нарықтық құны мен жалдау ақысын негізге алған. Зерттеу нәтижесінде Қазақстанда пәтерді жалға беру оның құнын орта есеппен 9,6 жылда ғана өтейтіні анықталды.
Көкшетау қаласы пәтер құны ең жылдам ақталатын қалалар арасында көш бастап түр. Бұл қаладан пәтер сатып алып, оны жалға беріп қойса, 8 жылда ақшасын шығарып алуға болады.
Екінші орында Ақтөбе: бұл қалада шыққан шығын орны 8 жыл 7 айда толады. Ал үшінші орында Қостанай тұр: бұл қаладағы пәтерді жалға берсе, 8 жыл 9 ай дегенде кеткен ақша табыс ретінде қайтады. Дәл осы қалаларда инвестиция тез ақталып, пайда әкеле бастайды.
Ал Ақтау, Шымкент және Алматы қалалары, керісінше, инвестиция ең ұзақ ақталатын қалалар қатарына енген. Бұл қалаларда пәтердің өзін-өзі ақтау мерзімі 10 жылдан асады. Мәселен:
- Ақтау – 11 жыл 9 ай.
- Шымкент – 11 жыл 3 ай.
- Алматы – 10 жыл 7 ай.
Бұл ретте сарапшылар көптеген қазақстандық үшін пәтерді жалға беру табыс табудан гөрі, ақшаны сақтау құралы ретінде маңызды екенін атап өтеді. Себебі жалдау табысы жылына шамамен 10%-ды құрайды, ал депозиттер 15%-ға дейін пайда әкелуі мүмкін. Дегенмен пәтер құны мен жалдау ақысының өсуі, инфляцияны ескерсек, бұл әдіс қаржыны сақтау және инфляциядан қорғаудың өзекті құралы болып қала береді.
