Франция Қазақстанға 4,6 млн еуро көлемінде грант береді. Бұл ақша қайда жұмсалады?
Франция Қазақстанға 4,6 млн еуро көлемінде грант береді. Сенатта Француз даму агенттігі тобының Қазақстандағы қызметінің құқықтық, салықтық және қаржылық шарттарын айқындау мәселесі талқыланды.
Екі мемлекет арасындағы келісімге сәйкес, Француз даму агенттігі елдің денсаулық сақтау саласына 945 мың еуро, Балқаш көлінің жоспарына 1,3 млн еуро, Арал бассейні өңірінің мектептерінде білім беру іс-шараларын жүзеге асыруға 2,4 млн еуро көлемінде грант беруді жоспарлап отыр.
Бұдан бөлек Франция Қазақстанның мемлекеттік және жеке компанияларына 15 жылға дейін ұзақ мерзімді қарыз беруге келісіп отыр.
«Француз агенттігі Қаржы даму институты ретінде негізінен энергетика, көлік, коммуналдық шаруашылықтағы инфрақұрылымдық жобаларды қаржыландырады. Сондай-ақ агенттік инфрақұрылымдық жобалар пулы, оның ішінде сумен жабдықтау, санитария немесе ирригация секторын қаржыландырады», – деді заңды таныстырған депутат Бибігүл Жексенбай.
Сондай-ақ бұл агенттік әйелдер кәсіпкерлігіне арналған кредит желісін ұйымдастырады және осы салаға қатысты жобаларға грант бөліп, техникалық жәрдемдесуге көмектеседі. Ал техникалық жәрдемдесу шеңберінде Француз даму агенттігі Ақтау портын кеңейту және Қазақстанның оңтүстігінде электр желілерін салуға қатысты бірнеше жобаларды да жүзеге асыруға атсалысады.
