«Жетісу» футбол клубы болмайды – облыс әкімі

2025 жылдан бастап «Жетісу» футбол клубы болмайды. Бұл туралы Орталық коммуникациялар қызметінде Жетісу облысының әкімі Бейбіт Исабаев айтты.

«Жетісу» футбол клубы санаулы 11 күннен кейін болмайды. Оны бәсекелестік ортаға шығарамыз. Бюджеттан ақша бөлінбейді. Конкурсқа шығарамыз. Қатысам деген заңды тұлғалар қатысады. Конкурстан жеңіп алғаны ары қарай клубпен жұмыс істейді»,- деді әкім.

Десе де, әкім клубқа Самат Смақовты бапкер ретінде шақырғанын, белгілі футболшыға жақсы жағдай жасау көзделіп отырғанын айтты.

«Мен футбол клубының осы және өткен жылғыдай турнирлік таблицаның ең соңында жүргенін қаламаймын. Жетісулықтар мен талдықорғандықтар футболға ұялмай баратындай клубтың бұрынғы атағын қайтару керек», – деді Исабаев.

Еске сала кетсек, жазда Талдықорған қалалық соты «Жетісу» футбол клубының спорт директоры Д. М. Иманқұловқа қатысты үкім шығарған болатын. Иманқұлов клубқа тиесілі қаражаттан 5,5 млн теңгені жымқырды деп айыпталып, 3,5 жылға сотталып, бас бостандығын шектеу жазасына кесілді.