Соңғы аптада кинотеатрларда бірнеше фильмдер жоғары табысқа жетті. Әсіресе, көрермендер арасында Disney студиясының туындылары мен отандық фильмдер үлкен сұранысқа ие болды. Ticketon билет операторының мәліметінше, ең көп касса жинаған фильмдердің көшін «Арыстан патша: Муфаса» бастап тұр.
Муфаса: Арыстан патша – 333 574 228 теңге
Disney компаниясының танымал «Арыстан патша» мультфильмінің тарихи желісі ретінде түсірілген бұл фильм көрермендердің жүрегін жаулап алды. Бұл туынды Симбаның әкесі Муфасаның өмір жолын баяндайды. Сондай-ақ, фильм қазақ тіліне дубляждалған.
Қазақ әлемі – 274 690 039 теңге
Отандық киноиндустрияның тағы бір жемісі – «Қазақ әлемі». Ұлттық құндылықтарды дәріптеген бұл туынды өз көрермендерін тауып жатыр. Фильмде Бейбіт пен Ермек есімді екі дос ауылдан Алматыға арман қуып келеді. Бейбіт сүйіктісі Мадинаға өз сезімін дәлелдеу үшін белгілі продюсер Нұрлан Қоянбаевтың мобилографы болуға тырысып, артынан жүгіреді. Фильм достық, арман және шынайы құндылықтардың маңыздылығын көрсетеді. Нұрлан Қоянбаев түсірген жаңа комедиясы алғашқы аптада 274 млн табыс тапты.
Жауап бер – 103 841 608 теңге
Баян Алагөзованың жаңа фильмі алғашқы аптада 103 млн жинады. Бұл туынды – сот залында өтетін әйелдердің тағдыры туралы психологиялық драма. Негізгі оқиға күйеуін өлтірді деп айыпталған Диана мен оның ісіне қатысушы бес әйелдің қарым-қатынасы, жеке құпиялары жайында. Фильм абьюз, шындық және еркіндік тақырыптарын қозғайды.
Моана 2 – 77 817 792 теңге
Disney студиясының тағы бір туындысы төрт аптадан бері көрермендердің сұранысына ие. Сондай-ақ, «Моана 2» фильмі қазақ тіліне дубляждалған фильмдер араысында ең табысты жоба болып, рекорд орнатқан еді.
