Ақтөбе мұнай жабдықтары зауыты жаңа компания иелігіне өтті
Миллиардер Ыдырысовтың отбасы Ақтөбе мұнай жабдықтары зауытының акционерлері құрамынан шықты. KASE Қазақстан қор биржасында осыған қатысты мәліметтер жарияланды.
Бұған дейін Ақтөбе мұнай жабдықтары зауыты мына адамдарға тиесілі болды:
- Оңғарбек Болысбеков – 29,89%;
- Магда Ыдырысова (Дінмұхамет Ыдырысовтың әйелі) – 29,89%;
- Ордабасы тобы (құрылтайшылары Дінмұхамет Ыдырысов пен Жармұхамед Аппаз) – 28,37%;
- Ләззат Бидашева – 11,68%.
Алайда 5 желтоқсанда зауыт акционерлерінің құрамы өзгерді. Оңғарбек Болысбеков өз үлесін сақтап қалды, ал KazMetalInvest компаниясы 69,5% акцияның иесі болды. Магда Ыдырысова, Ләззат Бидашева және «Ордабасы тобы» серіктестіктегі үлесін тоқтатты.
eGov.kz ақпаратына сәйкес KazMetalInvest 2024 жылдың сәуір айында тіркелген. Оның негізін қалаушы Айдар Аманжолов. Компания шағын бизнес болып саналады.
Дінмұхамет Ыдырысов Forbes 2024 тізімінде Қазақстандағы ең бай бизнесмендер арасында 17-орында тұр. Оның байлығы – 530 миллион доллар. Идрисов Ordabasy Group-тан бөлек ,Шымкент, Қарағанды, Түркістан және Маңғыстау мен Шығыс Қазақстан облыстарында жұмыс істейтін «Қазақстанның коммуналдық жүйелері» компаниясына иелік етеді. Сондай-ақ «Керегетас» тау-кен өндіру кәсіпорны, «Үшқұю», Kundybai Mining және басқа да компанияларда үлестері бар.
2023 жылы Ақтөбе мұнай зауытының таза пайдасы 491,7 млн теңгені құрады. 2024 жылдың тоғыз айында кәсіпорын 980,6 млн теңге табыс тапты. Зауыт мұнай кәсіпшілігі мен бұрғылау геологиялық барлау жабдықтарын шығарады. Бұл өнімдердің негізгі сатып алушылары – «Маңғыстаумұнайгаз», «Өзенмұнайгаз» және «Қаражанбасмұнай».
