Жаңа жылдық демалыста Алматының қоғамдық көліктері жұмыс кестесін өзгертеді

Жаңа жылдың алғашқы күндеріндегі демалыс кезінде Алматыдағы қоғамдық көліктер мерекелік жұмыс кестесіне көшеді. Бұл туралы қала әкімдігі хабарлады.

«Алматы қаласы метрополитенінің жұмысы демалыс күнінің кестесі бойынша сағат 06:20-дан 00:00-ге дейін 12-15 минуттық қозғалыс аралығымен ұйымдастырылады», – делінген хабарламада.

Алматы қалалық мобильділік басқармасының ақпаратына сүйенсек, 1 қаңтарда әдеттегі желіге жоспарланған маршруттардың 50%-ы ғана жолға шығады. Ал 2-4 қаңтарда қоғамдық көлік демалыс күнінің кестесі бойынша жұмыс істейтін болады. 

Дегенмен туристік орындарға апаратын көліктердің жұмысы күшейеді. Алматы-2 теміржол вокзалынан «Медеу мұз» айдынына апаратын №12 автобус 1-4 қаңтар аралығында 20 көлікті жолға шығарады. Яғни демалыс күндердегі күшейтілген кестемен жұмыс істейді. 

Түнгі маршруттың жұмысында өзгеріс болмайды. Орбита ықшамауданынан Алматы халықаралық әуежайына қатынайтын №3 түнгі автобус жұмысын жалғастырады.