Назарбаев университеті шетелге заңсыз шығарылған қаржысын қайтаруды көздеп отыр
Назарбаев Университеті (NU) бұрынғы ректоры Шигео Катсудың әрекеттері салдарынан бақылаудан тыс қалған активтерді қайтаруға белсенді түрде кіріспек. Бұл туралы университеттің баспасөз қызметі хабарлады.
«Назарбаев Университеті Jusan Bank акциялары ҚР қайтарылғаннан кейін, АҚШ-тағы NGF қорында қалған қаражатты қайтару үшін белсенді шаралар қабылдайды. Қазақстандық тараппен жасалған келісімге сәйкес, бұл қаражат ағымдағы жылы NU мен Назарбаев Зияткерлік мектептерін (НЗМ) қаржыландыруға бағытталуы тиіс болатын,» – деп хабарлады университет.
Айта кетейік, Шигео Катсу 2011-2023 жылдар аралығында Назарбаев Университетінің президенті қызметін атқарған. Университеттің мәліметінше, 2022 жылы ол NGF қорының директорлар кеңесінен Қазақстан өкілдерін шығарып, Jusan Bank тобына бақылау орнатуға тырысқан. Қорды басқаруға оған адал шетелдік өкілдер тағайындалады.
«Соның салдарынан миллиардтаған теңге әлі күнге дейін университетке түскен жоқ. Бұдан бөлек, 2018-2022 жылдары Шигео Катсу өзінің досының шағын америкалық компаниясының акцияларына инвестиция салған қаражатты қайтаруға да күш саламыз. Бұл қаражат медициналық жабдықтар өндіруге арналған деп мәлімделген болатын, бірақ оның нақты сомасы бірнеше миллиард теңгені құрайды,» – делінген университеттің баспасөз хабарламасында.
Jusan Bank пен NGF қорының Назарбаев Университеті және Назарбаев Зияткерлік мектептеріне қандай қатысы бар дегенге келсек. Бастапқыда Jusan Bank осы екі ұйымды қаржыландыруға тиіс еді. 2020 жылдың сәуіріне дейін банк Назарбаев Қорының бақылауында болды. Алайда 2019 жылдың желтоқсанында құрылған New Generation Foundation (NGF) америкалық қоры банк тобына бақылау орнатты.
2023 жылдың басында Алматы прокуратурасы Jusan Bank-ті шетелдік юрисдикцияға беруді заңсыз деп тану туралы талап-арыз береді. Прокуратураның айтуынша, NGF қоры Jusan Bank-ті басқару міндетін орындай алмаған, бұл студенттер мен мектеп оқушыларына зиян келтірген.
2023 жылдың маусымында барлық сот процесі аяқталып, Jusan Bank пен оның еншілес ұйымдары Қазақстан меншігіне қайтарылды. Алайда банк Назарбаев Қорына емес, бизнесмен Ғалымжан Есеновке берілді. Қазіргі таңда банк акцияларының 79,63%-ы First Heartland Securities-ке, ал 20,11%-ы тікелей Есеновтің меншігінде.
