Алматы қалалық мобильділік басқармасының мәліметінше, 2025 жылы қалада шамамен 300 км жолға және 30 км жаяу жүргіншілер жолына жөндеу жұмыстарымен 35 км жаңа жол салу жоспарланған.
Жаңа жолдар Жас Қанат, Шұғыла, Әлмерек, Ақжар, Рахат, Мәдениет және Боралдай шағын аудандарында салынады. Бұл Алматыға қосылған аумақтарда тұратын 70 мыңнан астам тұрғынның көлік қатынасын жақсартады.
2025 жылы қай жобалар аяқталады?
Алматы әкімдігінің мәліметінше, 2025 жылы Алматыда бірнеше маңызды жобаның құрылысы аяқталады:
- Сейфуллин даңғылы мен Жансүгіров көшесінің қиылысындағы жолайырық;
- Саин көшесін Рысқұлов даңғылынан Ақын Сара көшесіне дейін ұзарту;
- Абай даңғылын қаланың шекарасына дейін ұзарту.
Абай даңғылын ұзарту
Абай даңғылын Б.Момышұлы көшесінен қаланың шекарасына дейін ұзарту жұмыстары мамыр айында аяқталады. Ұзындығы 5,3 км болатын бұл алты жолақты жолда жаяу жүргіншілер мен велосипед жолдары қарастырылған.
Саин көшесін ұзарту
Жаз мезгілінде Саин көшесінің Рысқұлов даңғылынан Ақын Сара көшесіне дейінгі бөлігін ұзарту жұмыстары аяқталады. Ұзындығы 3,2 км болатын бұл жоба Момышұлы көшесіндегі көлік жүктемесін 40%-ға азайтуға мүмкіндік береді.
Жолайырық құрылысы
Маусым айында Жансүгіров көшесі мен Сейфуллин даңғылының қиылысындағы жолайырықтың құрылысы толығымен аяқталады. Сонымен қатар, жолайырық маңындағы аумақты абаттандыру жұмыстары да жүргізіледі.
