Оңтүстік Кореяда президентті тұтқындау үшін полициға ордер берілді

Оңтүстік Кореяның сыбайлас жемқорлыққа қарсы тергеу басқармасы ел президенті Юн Сок Ёльге қарсы көтеріліс ұйымдастыру ісі бойынша ордер орындау құқығын полицияға тапсырды. Бұл туралы Yonhap агенттігі хабарлады.

Агенттіктің мәліметінше, сыбайлас жемқорлыққа қарсы басқарма алғашқы әрекеттің сәтсіз аяқталуынан үш күн өткен соң ордерді орындауды полицияға беру туралы шешім қабылдаған.

Қаңтардың басында құқық қорғау органдары президенттің Сеулдегі резиденциясына оны тұтқындау мақсатында барған. Тергеу барысында шамамен 150 құқық қорғау қызметкері жұмылдырылды, олардың ішінде 30-ы жоғары лауазымды тұлғаларға қатысты сыбайлас жемқорлыққа қарсы тергеу басқармасының мамандары және 120 полиция қызметкері.

Алайда президентті қорғау қызметі резиденцияға кіруге және тінту жүргізуге рұқсат бермей, құқық қорғау органдарының әрекеттеріне кедергі келтірген.

31 желтоқсан 2024 жылы сот Юн Сок Ёльді тұтқындау туралы ордер шығарған болатын. Алайда президенттің адвокаттары ордердің заңды күшіне күмән келтіріп, оны жарамсыз деп мәлімдеді.

Еске сала кетейік, Оңтүстік Кореядағы жағдай желтоқсан айының басында шиеленісті. Президент Юн Сок Ёль үкіметті басқарудағы қиындықтарға байланысты елде әскери жағдай енгізген болатын. Бұл қадамды ол импичмент процедураларын жүргізудегі қауіпке байланысты мәжбүрлі шешім деп түсіндірді.

Әскери режимді басқаруға құрлық әскерлерінің штаб басшысы Пак Ан Су тағайындалды. Әскери жағдай кезінде елде парламент, саяси партиялар және түрлі қоғамдық бірлестіктердің қызметі тоқтатылды. Сеул көшелеріне әскери техника шығарылды.

14 желтоқсанда Оңтүстік Кореяның парламенті президент Юн Сок Ёльге импичмент жариялау туралы шешім қабылдады. 204 депутат президентті қызметінен босатуды қолдаса, 85 қарсы болды. Конституциялық сотқа бұл іс бойынша шешім қабылдау үшін 180 күн беріледі.