Владимир Зеленский Украинадағы президент сайлауы соғыс аяқталған соң ғана өтетінін мәлімдеді
Украина президенті Владимир Зеленский американдық подкастер Лекс Фридманға берген сұхбатында, елде президенттік және парламенттік сайлау соғыс аяқталған соң бірден өтетінін мәлімдеді.
Зеленскийдің айтуынша, 2024 жылы Украинада әскери жағдайға және Конституция талаптарына байланысты сайлау өтпеді. Ол елдегі қазіргі жағдайды ескере отырып, «соғыс аяқталмайынша немесе заңнама өзгермейінше сайлау өткізу мүмкін емес» екенін атап өтті.
Сайлауды ұйымдастырудағы қиындықтар
Президенттің пікірінше, халық бұл мәселеге түсіністікпен қарап отыр, себебі сайлау өткізудің қазіргі жағдайда бірқатар объективті қиындықтары бар:
- 8,5 миллион украиналықтың шетелге қоныс аударуы;
- Оккупацияланған аумақтарда өмір сүріп жатқан миллиондаған халықтың дауыс беру мүмкіндігінің жоқтығы;
- Әскери қызметкерлердің сайлауға қатысуы мәселесі.
«Біз халықтың сенімінен шығатын сайлау өткізгіміз келеді. Бұл үшін шетелге кеткен азаматтарға дауыс беру мүмкіндігін қамтамасыз ету керек. Сондай-ақ, қазіргі оккупацияланған аумақтар мен әскери қызметкерлердің қатысуы мәселесін шешу қажет. Мұның бәрі өте қиын сұрақтар,» – деді Зеленский.
Соғыс жалғасып жатқан жағдайда, заңнаманы өзгертіп, онлайн дауыс беру сияқты жаңа жүйелерді қарастыру қажет екенін президент атап өтті. Дегенмен, мұндай қадамдар қауіпсіздік мәселелерімен тығыз байланысты, әсіресе кибершабуылдар қаупі тұрғысынан.
«Біз 2025 жылы соғысты аяқтай алатынымызға сенемін. Сайлау сол жылы өтеді,» – деді Зеленский.
Зеленскийдің Трамп және Путинмен келіссөздері туралы пікірі
Журнатистің «АҚШ-тың жаңа президенті Дональд Трамп және Ресей президенті Владимир Путинмен үшеуара кездесу мүмкін бе?» деген сұрағына жауап берген Зеленский, алдымен тек Трамппен кездесуді жоспарлап отырғанын айтты.
«Біз бірінші кезекте Трамппен кездесіп, соғысты тоқтату және қауіпсіздік кепілдіктерін талқылаймыз. Егер ол сенімді кепілдіктер ұсына алса, содан кейін ғана Ресеймен келіссөздер жүргізуге болады,» – деді Зеленский.
Президенттің пікірінше, бұл процеске Еуропаның қатысуы маңызды, себебі Еуропа Украинаның позициясын қолдайды және қауіпсіздік кепілдіктерін нығайтуға ықпал ете алады.
Зеленский Трамптың Украинаның қауіпсіздігін қамтамасыз ететін күшті кепілдіктер ұсына алатынына сенім білдірді. Дегенмен, соғысты тоқтату туралы келісімнің сенімді кепілсіз жасалуы Путиннің жаңа шабуылдар жасауына мүмкіндік беретінін атап өтті.
