Алматы қаласы әкімінің экс-орынбасары қытайлармен бірігіп Ақтөбе облысында цемент зауытын салмақ
Ақтөбе облысында қытайлық компания «Sinoma Cement Co. Ltd» мен қазақстандық «Primus Capital» ЖШС-мен бірлесе отырып, 2027 жылы жылына 1,3 млн тонна цемент шығаратын зауыт ашуды жоспарлап отыр. Зауытта 360 жұмыс орны болады. Жоба құны 200 млн АҚШ долларынан асып жығылады.
«Primus Capital» ЖШС-ның иесі – бұрынғы шенеунік Сапарбек Тұяқбаев. Компания құрылтайшылары ретінде Сапарбек Тұяқбаев Құрақбайұлы және Құрақбай Нұрлан көрсетілген.
Сапарбек Тұяқбаев 2017-2019 жылдар аралығында «KAZAKH INVEST» ҰК» АҚ басқарма төрағасы болып қызмет атқарған. 2019 жылдан 2020 жылға дейін Алматы қаласы әкімі орынбасары болды.
Аталған жобаны жүзеге асыру үшін Қазақстан үкіметімен Инвестициялар туралы келісімге қол қою жоспарланып отыр. Қазіргі кезеңде Ақтөбе облысы Байғанын ауданында бор, топырақ және мергел кенішіне лицензия рәсімделген. Геологиялық барлау жүргізіліп, шикізат қоры мен сапасы бекітілген.
«KAZAKH INVEST» ҰК» АҚ хабарламасына қарағанда, басқарма төрағасы Ержан Елекеев Қытайдың «Sinoma Cement Co. Ltd» компаниясының президенті Якун Ронгпен кездесу өткізген. Кездесу барысында тараптар аталған зауыттың құрылысының жобасын талқылады.
Sinoma Cement өкілдерінің айтуынша, бұл зауыт – компанияның Қазақстандағы, жалпы, Орталық Азиядағы қолға алған алғашқы жобасы. Якун Ронгтің сөзіне қарағанда, зауыт салуға Ақтөбе облысы бекер таңдалынбаған. Бұл өңір Қазақстанның да, Ресейдің де нарығына шығуға қолайлы.
Ержан Елекеевтің айтуынша, еліміздің батыс өңірлерінде мұнай-газ ресурстары мен өнеркәсіп кешендері шоғырланған. Бірақ цемент өндірісі жоқ.
Sinoma Cement – Қытай мемлекеттік корпорациясының бір бөлігі. Шетелдерде цемент өнеркәсібінің өндірістің активтеріне инвестиция салуға маманданған. Африка мен Таяу Шығыс елдерінде 20 жобаны жүзеге асырып үлгерген. Sinoma-ның тобының негізгі корпорациясы – «China National Building Material Group» мелекеттік конгломераты. Ол Fortune 500 тізіміне кіреді. Әлемдегі құрылым материалдарын өндіретін ең ірі өндіруші.
