Тибет аймағындағы жер сілкінісі болды. Адам шығыны бар

Тибет аймағында қатты жер сілкінісі болды. Қаза тапқандар бар. Қытайдың сейсмологиялық желі орталығының (CENC) хабарлауынша, Непалмен шекаралас Қытайдың Тибет автономиялық ауданында жергілікті уақыт бойынша таңғы сағат 9-да 6,8 балдық жер сілкінісі болды.

«7 қаңтарда сағат 12:00-дегі жағдай бойынша барлығы 49 жер сілкінісі тіркелді, оның ішінде магнитудасы 3,0-ден төмен 33 жер сілкінісі, магнитудасы 3,0 және одан жоғары 16 жер сілкінісі, атап айтқанда 3,0-ден 3,9-ға дейінгі 13 жер сілкінісі және магнитудасы 4,0-ден 4,9-ға дейін үш жер сілкінісі есепке алынды. Негізгі дүмпу ошағынан 18 шақырым жерде  4,4 баллды құрайтын ең жоғары дүмпулер тіркелген», – делінген орталық хабарламасында.

Таулы жерде 62 мың адам өмір сүреді.

Магнитудасы 6,8 болатын жер сілкінісі, нақты айтқанда Тибет автономиялық ауданы Шигацэ уезінің Тингри ауданында болды. Эпицентрден 20 шақырым радиуста 3 қала мен 27 ауыл бар, оларда 6,9 мыңға жуық адам тұрады.

Xinhua агенттігінің жазуынша, ҚХР төрағасы Си Цзиньпин құтқару жұмысына барлық күшті жұмылдыруды тапсырды.

«Іздестіру-құтқару жұмыстарын жүргізу, зардап шеккендерге көмек көрсету, зардап шеккендерді азайту, қайталама келеңсіз салдардың алдын алу, апаттан зардап шеккендерді дұрыс орналастыру, зардаптарды жою бойынша жұмыстарды сапалы жүргізуге бар күш-жігерді салу қажет», – деді ол.

Америка Құрама Штаттарының Геологиялық қызметі (USGC) Шигацэ қаласынан оңтүстік-батысқа қарай 177 шақырым жерде магнитудасы 7,1 болатын жер сілкінісі туралы хабарлады. Жерасты дүмпулері Непал астанасы Катмандуда да сезілді.

Бір апта бұрын Алматыдан 350 шақырым жерде дүмпу тіркелген.