Қазақстан халқы Ассамблеясы қайырымдылықпен айналыса ма?
Президент Қасым-Жомарт Тоқаев Қазақстан халқы Ассамблеясына бірнеше жаңа құзырет берді. Олардың арасында қайырымдылық және демеушілік қызметтерін ұсыну бар.
Тоқаев 2024 жылдың соңында қол қойған бұйрықтың мәтіні енді жария болды. Енді Ассамблея қоғамдық келісім және жалпыұлттық бірлік саласында қайырымдылықты, медиацияны дамытуға жәрдемдеседі.
Құжатта Қазақстан халқы Ассамблеясының мәртебесі мен өкілеттіктері туралы жазылған. Оған сәйкес, ұйым елдегі этносаралық қатынастар саласындағы мемлекеттік саясатын әзірлей алады.
«Қоғамдық келісім мен жалпыұлттық бірлікті нығайту бойынша мемлекеттік органдармен, ұйымдармен, азаматтық қоғам институттарымен және халықаралық ұйымдармен өзара іс-қимыл жасайды», – делінген құжатта.
Бұған қоса, Ассамблея заң аясында елде қайырымдылық және демеушілік қызметпен айналыса алады. Ұйым қоғамдық келісім мен жалпыұлттық бірлікті қамтамасыз ету жөніндегі мемлекеттік саясатты әзірлеуге және іске асыруға ықпал етеді. Мемлекеттік және өзге халықтардың тілдерін дамыту шараларын іске асыруы қажет.
Айта кетейік, 2022 жылға дейін Ассамблеяның өмір бойына төрағасы Нұрсұлтан Назарбаев болып келген. Алайда «Елбасы туралы» заңның күші жойылғаннан кейін, ұйымның басшысы Қазақстан президенті болатын болды.
