АҚШ тағы да Қазақстандағы екі компанияға санкция салды

АҚШ Ресейдің энергетика саласына қарсы жаңа санкциялар пакетін дайындады. Бұл тізімге Ресеймен байланысы бар екі қазақстандық компания да кірді.

Ресейлік екі ірі мұнай-газ компаниясы «Газпром нефть» пен «Сургутнефтегаз» санкцияға ұшырады. «Совкомфлот», «Роснефть» және «Газпром Нефть» компанияларына қатысы бар 100-ге жуық кемеге қысым күшейеді.

Тізімге Ресейдің 30-дан астам мұнай сервистік компаниялары, Мәскеу және Омбы мұнай өңдеу зауыттары – «Газпром нефть» пен «Сургутнефтегаз» кіреді.

Санкциялық тізімдегі тұлғалардың арасында «Росатом» бас директоры Алексей Лихачев, «Газпром нефть» және «Лукойл» басшылары Александр Дюков пен Вадим Воробьев, «Татнефть» бас директоры Наиль Маганов бар.

АҚШ Қазақстандағы компанияларға да шүйлікті:

• «Газпром Нефть» компаниясының қазақстандық еншілес кәсіпорны – «Газпром Нефть Қазақстан» (Қазақстан Республикасындағы жанармай құю станциялары желісіне иелік етеді);
• «Совкомфлотпен» байланысы бар UMBRA NAVI SHIPMANAGEMENT CORP қазақстандық компаниясы.

Екі компания да Алматы қаласында тіркелген. UMBRA NAVI SHIPMANAGEMENT CORP компаниясына тиесілі Oxis кемесі де санкцияланды.

Былтыр АҚШ қайталама санкция салынатын компаниялар мен заңды тұлғалар тізіміне Da Group пен Elem Group-ты қосты. Екеуі де Қазақстанда тіркелген.

Ресейлік Газпромбанк пен оның Қазақстандағы бөлімі де санкция құрығына ілікті.