Елімізде ауылдық жерлерді интернетпен қамтамасыз етудің жаңа технологиялық тәсілі сынақтан өтіп жатыр. Бұл туралы Цифрлық даму министрлігі хабарлады.
Министрліктің мәліметінше, пилоттық жоба аясында 100-ден астам ауыл заманауи сымсыз байланыс технологиясы (FWA) арқылы жоғары жылдамдықты интернетке қосылады. Бірінші болып Алматы облысындағы Сарыбай би ауылы қосылды.
Бұрын бұл ауылдың тұрғындары ескірген ADSL технологиясы арқылы интернетке қосылған еді. Жаңа FWA технологиясы арқылы интернет жылдамдығы секундына 200-300 Мбитке дейін жетіп, тұрақтылық пен кең аумақты қамту мүмкіндігін ұсынады.
Жоба шеңберінде ауылдағы 105 үй жаңа технологияның мүмкіндіктерін пайдаланып үлгерді. Қазіргі уақытта тұрғындар интернетке қосылуға белсенді түрде өтінім беріп жатыр.
Жаңа технологияның артықшылықтары
FWA технологиясының басты ерекшелігі – қымбат оптикалық желілерді тартпай-ақ, жоғары жылдамдықты интернетпен қамтамасыз ету мүмкіндігі. Жаслан Мәдиевтің айтуынша, бұл әдіс ауыл тұрғындарына заманауи онлайн сервистер мен цифрлық қызметтерді тиімді пайдалануға мүмкіндік береді.
«Қазақтелеком» АҚ Басқарма төрағасы Бағдат Мусин FWA технологиясының ауылдық жерлердегі интернет мәселесін тиімді шеше алатынын атап өтті. Оның айтуынша, «Ауылтелеком» еншілес ұйымы қазіргі таңда ең озық технологияларды анықтап, алдағы уақытта оларды кең көлемде енгізуді жоспарлап отыр.
Жаңа технологияның алғашқы кезеңінде 7 ауыл қамтылып, 200-ден астам үй шаруашылығы интернетке қосылды. 2025 жылда 100-ден астам ауылды қосу және ауылдық аймақтардағы 10 000-нан астам тұрғынды жоғары жылдамдықты интернетпен қамтамасыз ету жоспарланып отыр.
Министрдің айтуынша, бұл жоба ауыл тұрғындарына білім беру, денсаулық сақтау, бизнесті дамыту салаларында жаңа мүмкіндіктер ашып, елді мекендердің өмір сүру деңгейін арттыруға бағытталған.
