Газа секторындағы Израиль мен Хамас арасындағы атыс тоқтатылды

Газа секторында атысты тоқтату туралы келісім жоспарланған уақыттан бірнеше сағатқа кешігіп күшіне енді. Бұл туралы BBC арнасы хабарлады.

Израиль билігі 19 қаңтарда босатылатын тұтқындардың тізімін алғанын растады. Сондай-ақ, ХАМАС ұйымының тұтқындардың алғашқы легін босату үшін қажетті барлық есімдерді уақытында бермегенін алға тартып, атысты тоқтату режимін кейінге қалдырған болатын.

19 қаңтарда босатылуы жоспарланған үш тұтқынның есімі жарияланды: 24 жастағы Роми Гонен (Кфар-Врадимнен), 28 жастағы Эмили Дамари, 31 жастағы Дорон Штейнбрехер (Кфар-Аза елді мекенінен). Тұтқындарды босату жергілікті уақыт бойынша 16:00-ден кейін жүзеге асырылуы тиіс.

Бұл келісім ұзаққа созылған қақтығыстардың уақытша тоқтауына мүмкіндік берді. Тұтқындарды босату және атысты тоқтату процесі әлі де екі тараптың өзара сенімділігін талап етеді. Әлемдік қауымдастық бұл жағдайды бейбітшілікке қарай қадам ретінде бағалап отыр.

Айта кетейік, бұған дейін ХАМАС пен Израильдің атысты тоқтату туралы келісімге келгені, бірақ ресми Тель-Авивтің келісімді толық мақұлдамағаны айтылған.