Денсаулық сақтау министрлігі науқас парағын толықтай электронды форматқа ауыстырмақшы
Жарияланды
(жаңартылды )
Қазақстанда тағы бір құжат толығымен электрондық форматқа көшеді. Енді науқас парағы электронды нұсқада берілуі мүмкін. Құжат «Ашық НҚА» порталында жарияланды.
«Қағаз құжаттарды пайдалануды азайту және оңтайландыру мақсатында еңбекке уақытша жарамсыздық туралы анықтамалар мен ауруханалық парақтарды электрондық форматқа ауыстыру жұмыстары белсенді түрде жүргізілуде», — делінген Денсаулық сақтау министрлігінің түсіндірме жазбасында.
Айта кетейік, қазіргі уақытта аурухана парақтары электрондық және қағаз нұсқада беріледі.
«Бұл азаматтардың медициналық мекемелермен өзара әрекетін жеңілдетеді, сондай-ақ медициналық қызметтердің ыңғайлылығы мен қолжетімділігін арттырады», — делінген құжатта.
