Огай мен Кимге тиесілі «Қазақмыс» шахтасында жұмысшы қаза тапты

21 қаңтарда «Қазақмыс» компаниялар тобының Жезқазғандағы «Анненск» шахтасында 39 жастағы жұмысшы қаза тапты. Қайғылы оқиға туралы компанияның баспасөз қызметі хабарлады.

«Өндірістегі жазатайым оқиға салдарынан 1985 жылы туған 5-разрядты ұнтақтаушы қаза тапты», – делінген компания хабарламасында.

Кәсіпорын оқиғаның себептерін анықтайтын болады. Істі тергеу үшін арнайы комиссия құрылған. Компания марқұмның ұжымдық шартта көрсетілген барлық көмекті көрсетіп, жерлеу шығындарын өтейді.

2024 жылдың 7 қазанында «Қазақмыстың» Қарағанды облысындағы «Саяқ-3» шахтасында екі жұмысшы қаза тапқан.

«Қазақмыс»  – құрамында он кеніш, бес тау-кен байыту фабрикасы, мыс зауыттары бар Қазақстандағы кен өндіретін ірі корпорация. Корпорацияның Қарағанды, Балқаш және Жезқазғанда өндіріс алаңдары бар. Негізгі акционерлері Қазақстандағы бай кәсіпкерлер – Эдуард Огайға мен Владимир Ким. «Kazakhmys Copper» АҚ арқылы Ким «Қазақмыстың» 69,37%-на, ал Огай 29,73% үлесіне иелік етеді.