Қарашығанақ жобасында қуаты жылына 4 миллиард текше метр болатын газ өңдеу зауытының (ГӨЗ) құрылысына арналған EPC-келісімшарты алдағы күндері Оңтүстік Кореялық Hyundai Engineering және Sicim Kazakhstan консорциумына беріледі деп хабарлады Upstream Online өз дереккөздеріне сілтеме жасап.
«Қазақстан үкіметі ҚПО (Қарашығанақ Петролеум Оперейтинг – Курсив) акционерлеріне ГӨЗ құрылысы бойынша соңғы шешімді осы жылдың маусым айының ортасына дейін қабылдау туралы ультиматум қойды. Үкімет зауыт 2029 жылға дейін салынып, пайдалануға берілгенін қалайды. Егер ҚПО акционерлері шілдеге дейін құрылыс мәселесін шешпесе, ГӨЗ жобасы басқа инвесторға беріледі», – деп жазады PetroCouncil.
Басылымның мәліметінше, Hyundai Engineering ГӨЗ құрылысына 3,9 миллиард доллар мөлшерінде бәсекеге қабілетті баға ұсынған. Алайда ҚПО мердігерден бағаны тағы да төмендетуді сұрамақ. Мақалада Қазақстан Eni және Shell компанияларына Қарашығанақ газ өңдеу зауыты бойынша шешім қабылдау үшін соңғы мерзім белгілегені айтылған.
Үкімет елдегі үшінші ең ірі мұнай-газ кен орнының шетелдік операторларына ГӨЗ құрылысына қатысты түпкілікті инвестициялық шешімді қабылдау қажеттігін ескерткен. Бұл үкіметтің жобаны жүзеге асыру қарқынына алаңдаушылығымен байланысты.
Италиялық Eni және британдық Shell компаниялары Қазақстан үкіметінің ГӨЗ құрылысын 2029 жылға дейін іске қосу үшін маусымның соңына дейін мақұлдау туралы ультиматумына тап болып отыр. Бұл туралы үкімет пен акционерлер арасындағы келіссөздермен таныс дереккөздер хабарлаған. Билік зауыт Қарашығанақ кен орнындағы ілеспе мұнай-газ көлемін өңдеуді бастағанын қалайды.
Энергетика министрі Алмасадам Сәтқалиев 2024 жылғы 1 қаңтардағы жағдай бойынша Қарашығанақ кен орнындағы мұнайдың қалдық қоры мен конденсат қоры 253,2 миллион тонна, ал газ қоры 791,7 миллиард текше метрді құрайтынын мәлімдеді. Оның айтуынша, кен орнын игерудің болашақ жобалары аясында 2028 жылға дейінгі инвестициялық жобаларды жүзеге асыру жоспарланған, бұл жыл сайынғы мұнай өндіру көлемін 11 миллион тонна деңгейінде ұстап тұруға мүмкіндік береді.
Қарашығанақ операторы Karachaganak Petroleum Operating B.V. (KPO немесе КПО) 2023 жылы тұрақты және тұрақсыз сұйық көмірсутектер, экспортқа арналған шикі газ және ішкі тұтынуға арналған тазартылған газ түрінде 143 миллион баррель мұнай эквивалентін өндіргенін хабарлады. Бұл 2022 жылмен салыстырғанда (129 миллион баррель) 10,9%-ға артық. Компания кен орнына $31,3 миллиард инвестиция салған.
Қарашығанаты игеру халықаралық консорциум арқылы 1997 жылы қол қойылған әрі 40 жылға есептелген өнім бөлісу туралы келісім аясында жүзеге асырылады. Консорциум құрамына Shell (29,25%), Eni (29,25%), Chevron (18%), «Лукойл» (13,5%) және «ҚазМұнайГаз» (10%) кіреді.
Бұған дейін 2024 жылы Каспий Құбыр Консорциумы арқылы тасымалданған мұнай көлемі 63 млн тоннаға дейін азайғанын жазғанбыз. Оның ішінде Қарашығанақтан 9 816 458 тонна мұнай тасымалданған.
