Димаш Құдайберген Венгрия астанасы Будапешт қаласында өтіп жатқан Virtuosos жобасына қазылар алқасының мүшесі ретінде қатысып жатыр. Бұл – классикалық музыка жанрындағы жас таланттардың байқауы.
Dimashnews ақпаратына қарағанда, байқауда Венгрия, Аустрия, Словения, Сербия және Черногория елдерінен келген дарынды музыканттар бақ сынайды.
«Virtuosos жобасының алғашқы түсірілім күні ескі достар мен жаңа таныстардың кездесуінен басталды. Қазылар алқасының көптеген мүшелері бұл шоуда бірнеше жыл қатарынан қазылар алқасының мүшесі болса, кейбіреулері жобаға алғаш рет келіп жатыр», – делінген мақалада.
Димаш кіші Пласидо Домингомен, венгр кларнетист Иштван Коханмен кездесті. Сонымен қатар Еуропа мен Азияда ерекше өнерімен танымал болған Қытайдан келген дарынды сопрано Иньуо Вангпен танысты.
Димаш осы жобаның негізін қалаушы әрі продюсер Марианна Пеллерге Пласидо Домингомен бір сахнада ән айту арманын орындағаны үшін алғыс білдірген.
Димаш бұл байқауға екінші мәрте әділқазы ретінде қатысып отыр.
Сонымен қатар Димаш Құдайберген бүгін Қытайдағы көктемгі фестивальде Чунциндегі көрікті алаңда өнер көрсетіп те үлгерген.
Мұның алдында Димаш Құдайбергеннің Бибігүл Төлегеноваға бағалы бұйым сыйға тартқанын жазған едік.
