Apple корпорациясы SpaceX және T-Mobile US компанияларымен бірлесе отырып, iPhone смартфондарына Starlink спутниктік байланысын қосу бойынша серіктестік жүргізіп жатыр. Бұл туралы Bloomberg агенттігі хабарлады.
27 қаңтар күні шыққан iOS 18.3 жаңартуы iPhone құрылғыларына спутниктік байланысқа қосылу мүмкіндігін ашты.
T-Mobile операторлары Starlink-тің алғашқы бета-нұсқасына тіркелуге мүмкіндік берді, ал осы аптада бірқатар iPhone пайдаланушыларына бұл технологияны тестілеуге рұқсат етілді.
«Сіз T-Mobile Starlink бета-тестіне қатысасыз. Енді кез келген жерден спутник арқылы мәтіндік хабарлама жібере аласыз. Бұл функцияны қосу үшін iOS 18.3 жаңартуын орнатыңыз» – делінген T-Mobile хабарламасында.
Жаңартудан кейін iPhone құрылғыларының желі баптауларында спутниктік байланысты басқару үшін арнайы қосқыш пайда болды.
Starlink қалай жұмыс істейді?
Starlink – миллиардер Илон Масктің SpaceX компаниясы іске қосқан спутниктік интернет жүйесі. Бұл жүйе жерге жақын орбитада орналасқан мыңдаған спутниктер арқылы жаһандық байланыс ұсынады. Спутниктер 550 км биіктікте орналасқан, ал жердегі сигналды терминал қабылдап, Wi-Fi роутер арқылы таратады.
Қазіргі уақытта Starlink қызметі АҚШ, Канада, Еуропа, Аустралия, Латын Америкасы және Африканың кейбір елдерінде бар.
Еске сала кетейік, бұған дейін Apple компаниясы ChatGPT жасанды интеллектісін енгізіп, жаңа iOS 18.2 нұсқасын ұсынған еді.
