2024 жылдың жазында іске қосылған «Робот сот орындаушы» осы сала мамандарын 550 млн теңге табысынан айырған. Бұл туралы Орталық коммуникациялар қызметінде өткен брифингте Әділет вице-министрі Бекболат Молдабеков айтты.
«2024 жылдың тамыз айынан бүгінгі күнге дейін 9,6 млрд теңге сомасына 454 мың өндіріс қозғалды, бұл ретте үнемделген қаражат 551 млн теңгені құрайды», – деді вице-министр.
Министрлік өкілінің мәліметінше, қаражат азаматтардың айыппұлы мен қарызынан үнемделген. Өйткені айыппұл өндіру жұмысын робот тегін істейді. Cот орындаушылары бұл қызмет үшін борыш көлеміне 25% көлемінде үстеме қосады. Салдарынан азаматтар сот орындаушылардың қызметі үшін артық ақша төлеуге мәжбүр болады.
«Алдын ала есептеулер бойынша жеке сот орындаушыларының қызметіне төленетін 25%-ды алып тастау есебінен азаматтардың қаржылық жүктемесі жылына шамамен 5,5 млрд теңгеге азаймақ», – дейді Молдабеков.
Айта кетсек, робот жеке сот орындаушысының қатысуынсыз өндіріс ісін автоматты түрде қозғайды. Роботтар тек 20 АЕК-ке дейін айыппұлдар мен қарыз сомасы бойынша Egov Mobile арқылы 1414-тен SMS хабарлама және push-хабарлама жібере алады.
Бұл жасанды интеллектіні Әділет министрлігі 2024 жылдың тамызында іске қосқан болатын.
