Астана көшелеріндегі Sergek камералары алынып тасталады
Астанадағы интеллектуалды бейнебақылау жүйесі – «Сергектің» жұмысы тоқтайды. Бейнебақылау жүйесін енді Біріккен Араб Әмірліктерінен келген Presignt компаниясы басқаратын болды. Бұл шешімді қалалық мәслихат депутаттары мақұлдады.
«Сергекті» неге ауыстырып жатыр?
«Сергек» жобасын жасаушы «Көркем Телеком» компаниясының Астана әкімдігімен арадағы мемлекеттік-жекеменшік әріптестік (МЖӘ) келісімі аяқталды. Әкімдік келісімді ұзартпау туралы шешім қабылдады.
Жаңа жүйені кім басқарады?
Presignt компаниясы 2025-2030 жылдар аралығында қаладағы бейнебақылау жүйесін дамытуға жауапты болады. Жобаға 53 млрд теңге қаржы бөлінеді.
Негізгі міндеттері:
- «Ақылды қала» (Smart City) тұжырымдамасын дамыту
- Қауіпсіздікті арттыру
- Жолдағы тәртіпті қадағалау
Жобаның 100% шығынын жеке компания көтереді, ал 60%-ын қазақстандық кәсіпорындар қамтамасыз етеді. Presignt төлемдерді тек жоба іске қосылғаннан кейін ғана алады.
Қаладағы қолданыстағы бейнекамералар жаңа операторға бір ай ішінде беріледі.
«Сергек» жүйесі туралы
«Сергек» жобасы 2017 жылы мемлекеттік-жекеменшік әріптестік негізінде іске қосылды. «Көркем Телеком» компаниясы 8,4 млрд теңге жеке инвестиция салды, ал әкімдік 24,9 млрд теңге төлеген еді.
