Алматы қаласының Мәдениет басқармасы Алматы хайуанаттар бағының жұмысына қатысты ресми мәлімдеме жасады. Әкімдік «зообақты көшіруі мүмкін» деген ақпаратты жоққа шығарды.
Басқарма мәліметінше, хайуанаттар бағы өзінің қазіргі орында қызметін жалғастырады. Сондай-ақ қала аумағын дамыту жоспары шеңберінде, хайуанаттар бағы халықаралық стандарттарға сәйкес зоогеографиялық принциптер негізінде жаңғыртылады.
Әкімдік хайуанаттар бағын реконструкциялауға қатысты жобалау-сметалық құжаттаманы әзірлеу бойынша байқау өткізуді жоспарлап отыр. Реконструкциялау жұмыстары кезең-кезеңімен 2028 жылға дейін жүзеге асырылмақ.
«Жоспарланған реконструкциялау шеңберінде жүргізілетін жұмыстар жануарларды ұстау жағдайын едәуір жақсартуға және хайуанаттар бағына келушілер үшін жайлы болуына жол ашады», – делінген баспасөз хабарламасында.
