Путин мен Трамп әскери шығындарды қысқартуға келісті
Ресей Президенті Владимир Путин мен АҚШ президенті Дональд Трамптың әскери бюджеттерді қысқарту туралы ұсынысын қолдайтынын мәлімдеді. АҚШ президенті Ресей, Қытай және АҚШ қорғаныс шығындарын 50%-ға азайту туралы бастама көтерген болатын.
«Біз бұған қарсы емеспіз. Егер АҚШ әскери шығындарын 50%-ға азайтса, біз де дәл солай жасар едік. Қытай Халық Республикасы кейін қосылуға шешім қабылдаса, біз оны да қолдаймыз. Жалпы, бұл ұсыныс дұрыс деп санаймыз және осы мәселе бойынша келіссөздерге дайынбыз», – деді Путин ресейлік мемлекеттік телеарнаға берген сұхбатында.
Өз кезегінде Трамп та Ресей мен Қытаймен ядролық қаруды бақылау және әскери шығындарды қысқарту бойынша келіссөздер жүргізгісі келетінін мәлімдеді. Ол бұл қаражатты «өнімді салаларға бағыттау әлдеқайда тиімді болар еді» деп есептейді.
Алайда, сарапшылар бұл ұсыныстың жүзеге асу мүмкіндігіне күмәнмен қарайды, себебі әлемдегі геосаяси тұрақсыздық пен мемлекеттер арасындағы сенімсіздік қару-жараққа бөлінетін қаражаттың азаюына кедергі келтіруі мүмкін.
Украинаға қатысты БҰҰ-дағы шешімдер
Әскери шығындарды қысқарту туралы ұсыныстар айтылып жатқанда, халықаралық аренада Ресей мен Украина арасындағы қақтығысқа байланысты БҰҰ-да жаңа шешімдер қабылданды.
Сондай-ақ, АҚШ «Дорога к миру» (Бейбітшілікке жол) атты қарарын ұсынды. Бұл құжат қақтығысты тоқтатуға, қаза тапқандарға құрмет көрсетуге және бейбіт келіссөздер жүргізуге шақырады. Алайда, онда Ресейдің агрессиясы немесе Украинаның территориялық тұтастығы туралы нақты мәлімдемелер жоқ. Бұл құжат бастапқыда Еуроодақтың түзетулерімен ұсынылды, бірақ кейін БҰҰ Қауіпсіздік Кеңесінде АҚШ-тың бастапқы нұсқасы мақұлданды.
Ресей бұл шешімдерге қарсы болмағанымен, оған «қақтығыстың түпкі себебі» туралы өз түзетулерін енгізуге тырысты. Ресейдің ойынша, Украина НАТО-ға қосылуға ұмтылуы осы соғыстың басты себебі болған. Алайда, бұл түзету қабылданбады.
БҰҰ-дағы дауыс беру нәтижесінде, АҚШ-тың резолюциясы Қауіпсіздік Кеңесінде 10 мемлекеттің қолдауымен қабылданды, ал 5 ел қалыс қалды.
