Білім саласындағы цифрландыру үрдісі қазіргі кезеңде мұғалімдерге ауыр соғып, шашын ағартып жатқаны құпия емес. Дәурені жүріп тұрған әлеуметтік желіні бағындыру да мектептердің міндетіне айналды.
Білім саласы желіде
Мұның кімге қызық екені қайдам, әйтеуір, соңғы кездері мектептер де өтіп жатқан іс-шаралардың бейнероликтері Іnstagram мен tiktok секілді әлеуметтік желілерді жаулай бастады. Бұл үрдіс жаппай көрініс беріп жатыр. Еліміздің түкпір-түкпірінде солай. Демек бұл – мұғалімдердің жеке бастамасы емес деген сөз. Яғни білім саласындағы жоғарыдан түскен тапсырма екенін көрсетсе керек.
Инста-ұстаз тик-ток шәкірт тәрибелейді. Бұдан кейін Қазақстанда болашақта мықты блогерлер мен тиктокерлердің шығатына күмәнмен қарау – әбестік. Десе де, қоғамға ғалымдар, дәрігерлер, инженерлер де керек екенін ұмытпаған абзал тәрізді. Білім саласындағы жаңашылдықтар осыны да ескерсе.
Бұйрық қатты, жан тәтті
Қазір мұғалімдердің дені өткізген кез-келген іс-шарадан бейнероликтер түсіріп, инста-ұстазға айналып келеді. Бұл үрдіс білім саласындағы жаңашылдықтың жалпы білім сапасына әсері бар.
«Қазір сабақтың бәрін жайына қойып, бейнеролик түсіріп жүруге тура келеді. Кеше екі сағат бойы видео түсірдім. Бір сағат монтаждадым. Сөйтіп, жібердім. Сабақ өтуге мұршам болмады», – дейді «жаңашылдықты қабылдай» алмаған ұстаз Динара Құрмет (аты-жөні өзгертілді).
Бұл бейнежазбалар іріктелініп, аудандық, облыстық білім басқармаларының парақшаларынан да көзге шалынады.
Ашық сабақтар шоуға айналып жатыр
Қазір tiktok әлеуметтік желісінде ұстаздар мен шәкірттерді көп көруге болады. Мұғалімдер жеке өздері немесе оқушыларымен де түседі. Білім саласындағы әлеуметтік желінің орнын түсінбейтіндер көбейді. Әсіресе, ата-аналардың наразылығын тудырып отыр.
«Мұғалімдер сабақ өте ме, әлде тикток түсіріп жүре ме» деген орынды сауал қойылып жатыр.
«Ашық сабақтар да шоуға айналып жатыр. Сабаққа емес, концертке кіргендей болады екенсің», – дейді мұғалім Қарлығаш Досжан.
Цифрландыру үрдісі
Жоғарыда шыққан бір шешім мұғалімдер қауымын әуреге салып қоятыны жасырын емес. Маңыздылары да, елеусіздері де. Айталық, Kundelik.kz платформасына енді игеріп, оның жыры басылған кезде, одан бас тартылып, Қазақстан мектептері тоқсан аяқталғанда басқа платформаға көшті.
Бір платформадағы барлық ақпаратты екінші платформаға көшіруге қанша уақыт кетіп, қаншама көз жанардың таусылатынын айтып жату артық болар.
Платформалар легі
Қазір ustaz.orleu-edu.kz платформасы пайда болды. Мұғалімдердің еңбегі мен жетістігін көрсететін портфолио енді соған жүктеліп жатыр. Мұның өзі ұстаздар қауымын тағы да әуе-сарсаңға салды. Педагог-зерттеушілер мен педагог-шеберлер мұны енді egov порталына жүктемек.
Реформалардың кезең-кезеңмен, бірізді жүргізілмеуі ұстаздар қауымының көңілінен шықпай отыр. Категория алу үшін тестке тіркелудің өз машақаты бар.
Құлақ қағыс
Отыз жылдағы білім саласы Нұрсұлтан Назарбаевтың нөкерлерінің уақытша жұмыс орны болып келді. Сондықтан бұл орынтақтағы министрлер жиі ауысты. Білім саласының қожырап кеткені құпия болмаса керек. Мектеп бала оқытатын жер емес, қағаз тасыған министрліктің кеңсесіне көбірек ұқсап кетті. Жүйесіз жұмыстың бір дәлелі – мектеп оқулықтарын қайта-қайта басылуы. Мұның кесірінен мемлекетке 16 миллиард теңге шығын келтіріліп отыр
Асхат Аймағамбетов министрліктің тізгінін ұстағанда, мұғалімдерді қосымша жүктемелер мен қағазбастылықтан арылтуға күш салды. Оқу-ағарту министрі Ғани Бейсембаевтың жоғарыда көрсетілген мәселені ескерер деген үміт бар.
Әйтпесе, «оқушылар – мұғалімдердің құжаттармен жұмыс істеуіне кедергі жасайтын адамдарға айналды» деген мұғалімдер арасында кең тараған тәмсілге айналған бұл сөз өзектілігін жоғалтпайды.
