Қазақстанды Ресейдегі еңбек мигранттарына қатысты шектеулер алаңдатып отыр – Абаев

Ресейде еңбек мигранттарының отбасыларын алып келуіне тыйым мәселесі талқыланып жатыр. Бұл бастама Қазақстан азаматтарының алаңдаушылығын тудырып отыр. Қазақстанның Ресейдегі елшісі Дәурен Абаевтың «РИА Новости» агенттігіне берген сұхбатында аталған шектеулер екі елдің экономикалық және гуманитарлық қарым-қатынасына кері әсер етуі мүмкін екенін айтты.

Абаев Қазақстан мен Ресей халықтарының тарихи байланыстарын атап өтіп, олардың сауда, еңбек қызметі және өзара сапарлар арқылы тығыз араласатынын жеткізді. Еуразиялық экономикалық одақ аясында жұмыс күшінің еркін қозғалысы қамтамасыз етілгендіктен, жаңа шектеулер мигранттардың отбасыларына қиындық туғызуы мүмкін.

«Жақында шетелдіктердің Ресейде уақытша болу мерзіміне қатысты өзгерістер күшіне енді. Бұл ережелер барлық шетел азаматына, оның ішінде қазақстандықтарға да қатысты. Нәтижесінде, әдетте ұзақ мерзімге емделуге, науқас туыстарына күтім жасауға және басқа да гуманитарлық мақсаттармен келетін адамдар үшін қиындықтар туындады», – деп атап өтті Абаев.

Елшінің айтуынша, 2024 жылы Ресейде ресми түрде 105 мыңнан астам қазақстандық жұмыс істеген. Бұл елдегі барлық тіркелген шетелдіктердің 2%-дан азын құрайды. Соңғы бес жылда Қазақстаннан еңбек мигранттарының саны айтарлықтай өспеген.

Ресей билігі соңғы жылдары миграциялық саясатты күшейтіп келеді. «Крокус Сити Холл» терактісінен кейін заңнама қатаңдатылып, шетелдіктерге қатысты бірқатар шектеулер енгізілді. Олардың қатарында заңсыз мигранттардың реестрін құру, биоматериал тапсыру міндеті және заңсыз жүргендерге бірқатар қызметтерді шектеу шаралары бар.

Қазақстан тарапы жаңа өзгерістердің қарапайым азаматтардың құқықтарына нұқсан келтірмеуін қадағалап, Ресеймен әріптестік аясында еңбек мигранттарының мүдделерін қорғауға ниетті.

Бұған дейін Абаев Сирияда 30 шақты қазақстандық соғысып жүргенін айтқан.