Олигархтардан тәркіленген алты қымбат сағат сатылды

Жарияланды (жаңартылды )
Олигархтардан тәркіленген сағаттар жаңа иелерін тауып жатыр./ фото: KursivMedia мұрағаты
Олигархтардан тәркіленген сағаттар жаңа иелерін тауып жатыр./ фото: KursivMedia мұрағаты

Олигархтардан тәркіленген 6 эксклюзивті сағат E-Qazyna электрондық платформасында аукцион форматында сатылған.

Kuva ақпаратына қарағанда, олар қайтарылған активтер қатарына жатады.

«Сауда ашық бәсекелестік жағдайында өтті. Бұл активтердің нарықтық құнының максималды деңгейде болуының қамтамасыз етілуіне мүмкіндік берді», – делінген хабарламада.

Күші жойылған сауда

Алайда 3 лот бойынша электрондық сауда-саттықтың күші жойылған. Өйткені жеңімпаз белгіленген мерзімде сауда нәтижелері бойынша хаттамаға қол қоймаған. Осыған байланысты жою туралы акт толтырылыпты.

Қалған лоттар бойынша хаттамаларға қол қойылды. 10 жұмыс күні ішінде тараптар сатып алу-сату шартын жасасады. Активтің жеңімпазға берілуі тек оның толық құны сатушының шотына төленгеннен кейін жүзеге асады. Олигархтардан тәркіленген қымбат сағаттар жаңа иесін тауып жатыр.

Түсімдер қайда аударылады?

Бұл активтердің сатылуы E-Qazyna платформасында ұйымдастырылған. Аукционды ұйымдастырушылар саудаға сатып алушылар тарапынан қызығушылық бар деп атап отыр. Сонымен қатар аукциондық тетіктер арқылы әділ баға ұсынылған.

Түсімдер Арнайы мемлекеттік қорға аударылмақ. Олигархтардан тәркіленген қымбат мүліктердің ақшасы әлеуметтік маңызы бар жобаларды қаржыландыруға жұмсалады.

Компания уәжі

«Қайтарылған активтерді басқару компаниясы» ЖШС өз жұмысын сәтті деп бағалап отыр.

Компанияның пікірінше, сауда-саттық туралы ақпаратты барлық қатысушы ала алады. Активтер ең жоғары ұсынылған баға бойынша сатылады. Мәмілелер қысқа мерзімде іске асыралады.

«Компания ел экономикасына қайтарылған активтерді белсенді түрде интеграциялауды жалғастырып жатыр. Олардың тиімді пайдаланылуын қамтамасыз етіп, қоғам тарапынан сатылу процесіне деген сенімін арттырады», – делінген хабарламада.

Мұның алдында олигархтардан тәркіленген 28 эксклюзивті сағат сатылымға шығарылғанын хабарланған болатын.  

Сондай-ақ оқыңыз