Биыл Қазақстанда қант тапшы болмайды – вице-министр
2025 жылы елімізде қант тапшы болмайды. Сауда және интеграция вице-министрі Қайрат Төребаев бүгін Астанадағы брифингте осылай деп мәлімдеді.
Оның айтуынша, Үкімет өткен жылдардағы қателіктерден сабақ алып, биыл қант өндірісін көбейту жұмыстарын атқарып жатыр.
«Ауыл шаруашылығы министрлігі шаруаларға қант қызылшасын өсіруге көмектесіп жатыр. Бұған қоса қант зауыттарына да қолдау көрсетіледі. Жұмыс атқарылып жатыр. Сол себепті қант тапшылығы тағы қайталанады деп ойламаймын. Биыл қант тапшы болмауы тиіс», – дейді вице-министр.
Естеріңізге сала кетейік, Астана былтыр Ресейден 80 мың тонна қант сұрауға мәжбүр болды. Бұған қоса үкімет 2024 жылы тауар дефицитін болдырмау үшін қант экспортына тыйым салған.
2023 жылы республикада қант өндірісі 98%-ға құлдырады. Үкімет тауар өндірісін көбейту мақсатында Атырау облысында қант зауытын салмақ.
Алайда 2025 жылғы ақпанның аяғы мен наурыздың басында Қазақстанда қант бағасы 1,4%-ға қымбаттағаны мәлім болды.
