Air Astana әуе компаниясы мен оның еншілес лоукостері FlyArystan 2024 жылы 1,3 млрд АҚШ доллары көлемінде түсім алды. Бұл 2023 жылдың көрсеткіштермен салыстырғанда 12,4%-ға жоғары.
Компания түсімінің өсіміне жолаушылар мен жүк тасымалынан түскен қаржы, сондай-ақ авиациялық қозғалтқышты кері жалға алу ықпал еткен.
Жолаушылар тасымалынан түскен кіріс 1,2 млрд долларды құраса, ал жүк тасымалынан 26,3 млн доллар түскен. Сондай-ақ, компания қозғалтқышты сатып алып, бірден сату және оны кері жалға алу операциясынан 25 млн доллар табыс тапты.
Сонымен қатар Air Astana-ның шығыны да 13,5%-ға өсіп, 1,2 млрд долларға жетті. Соның салдарынан компанияның жылдық таза пайдасы 23,1%-ға төмендеп, 52,7 млн долларды құрады.
Былтыр Air Astana мен FlyArystan-мен бірлесіп 9 млн жолаушы тасымалдады, бұл 2023 жылмен салыстырғанда 1 млн адамға көп.
«Біз IPO аясында берген уәделерімізді орындап, бірінші жылда айтарлықтай өсімге қол жеткіздік. Салалық шығындар мен өткізу қабілетіне қатысты қиындықтарға қарамастан, біздің нәтижелеріміз сенімді», – деп мәлімдеді компания басшысы Питер Фостер.
Сондай-ақ директорлар кеңесі компания тарихында алғаш рет дивиденд төлеуді ұсынды. Бір қарапайым акция үшін – 53,7 теңге, ал төрт акцияға құқық беретін ғаламдық депозитарлық қолхат үшін – 214,8 теңге көлемінде арнайы дивиденд төлеу жоспарланып отыр.
Air Astana-ның ірі акционері – 41% үлесті иеленетін «Самұрық-Қазына» қоры. Сонымен қатар, акциялардың 23,27%-ы жеке инвесторлардың номиналды иелігінде, британдық BAE Systems компаниясына – 16,95% тиесілі болса, ал БЖЗҚ меншігінде 6,51% бар.
