Пікірталасты доғару керек! Тоқаев Қазақстанның бір уақыт белдеуінде қалатынын айтты
Президент Қасым-Жомарт Тоқаев уақыт белдеуі төңірегінде жүріп жатқан пікірталас нүктесін қойды. Президент Бурабайда өтіп жатқан құрылтайда Қазақстанның бір уақыт бедеуінде қалатынын айтты.
Тоқаев қоғам белсенділері уақыт белдеуіне қатысты алаңдаушылық тудырған соң, толыққанды зерттеу жүргізілгенін, олардың күдігі мен күмәні расталмағанын атап өтті.
«Енді бірыңғай уақыт белдеуіне көшуге қатысты пікірталасқа тоқталайын. Үкімет пен Парламент бұл мәселені талқылады. Арнайы зерттеулер жүргізілді, шешімге күмән келтірген қоғам белсенділерінің қаупі мен күмән-күдігі расталған жоқ. Үкіметтің және депутаттардың басым көпшілігінің, сондай-ақ мамандардың уәжімен келісемін: біздің кең-байтақ жеріміз бар, халқымыздың саны да салыстырмалы түрде алғанда көп емес. Сондықтан елімізде бірыңғай уақыт белдеуі болуға тиіс. Бұл тәсіл мемлекетті басқару ісін жеңілдетеді, логистика мен көптеген бизнес-үдерісті оңтайландыруға септігін тигізеді. Осымен пікірталасты доғару қажет деп ойлаймын, оның үстіне бұл мәселені саясиландырудың қажеті жоқ»», – деді президент.
