Telegram негізін қалаушы Дуров Франциядан Дубайға оралды
Telegram негізін қалаушы Павел Дуров Франциядан Дубайға оралғанын мәлімдеді. Десе де, билік танымал мессенджердегі қылмыстық әрекеттерді тергеп жатыр.
Дуровқа қарсы іс
Дуров 2024 жылдың тамыз айында Париж маңындағы әуежайда ұсталған болатын. Оған Telegram арқылы жасалған қылмыстар, соның ішінде есірткі саудасы, ақша жуу және балаларды жыныстық эксплуатациялау материалдарын тарату бойынша алдын ала айыптар тағылды. Дуров барлық айыптауларды жоққа шығарады.
Бұған дейін оған Франциядан шығуға тыйым салынған болатын, 5 миллион еуро көлемінде кепіл ақша төлеуге міндеттеліп, аптасына екі рет полицияға тіркелуге міндеттелді.
Дегенмен, 15 наурызда AFP агенттігі француз билігінің шарттарды жеңілдетіп, Дуровқа елден уақытша кетуге рұқсат бергенін хабарлады.
«Сіздер білетін шығарсыздар, мен бірнеше ай Францияда болғаннан кейін қылмыскерлердің Telegram-дағы әрекеттеріне байланысты тергеу жүріп жатқандықтан, Дубайға оралдым. Процесс жалғасуда, бірақ үйге оралғаныма қуаныштымын», — деп жазды Дуров өзінің мессенджерінде.
Сондай-ақ ол Франциядан шығуға мүмкіндік берген сол елдің тергеушілеріне алғысын жеткізді.
2024 жылдың желтоқсанында Павел Дуров алғаш рет Париж сотында өзіне қатысты қозғалған қылмыстық іс бойынша жауап берген болатын. Ол «Францияның сот жүйесіне сенетінін» мәлімдеді және іс бойынша қосымша түсініктеме беруден бас тартқан еді.
