Құрбан айтқа байланысты мектеп оқушыларының емтихан тапсыратын уақыты өзгереді

Құрбан айт мерекесіне байланысты мектеп оқушыларының емтихан тапсыратын уақыты ұзартылады. Бұл туралы Оқу-ағарту министрлігі талқылауға шығарған құжатта жазылған.

Құжатқа сәйкес 9-10 сынып оқушылары емтиханды 29 мамыр мен 10 маусым аралығында тапсырады. Бұрын соңғы емтихан күні 9 маусымда аяқталатын.

11-12 сынып оқушылары үшін емтихан тапсыратын уақыт 30 мамыр мен 16 маусым аралығында бекітілген. Бұрын жоғары сынып оқушылары емтиханды 13 маусымға дейін тапсыратын.

«Мерзім ресми мереке және демалыс күні болып саналатын Құрбан айттың бірінші күніне байланысты кейінге қалдырылып отыр. 2025 жылы бұл мереке 6 маусымға сәйкес келеді. Өзгерістер консультация алуға қолайлы жағдай жасау, сондай-ақ қорытынды бақылау нәтижелерімен келіспеген жағдайда апелляциялық комиссияға жүгіну мүмкіндігін қамтамасыз ету мақсатында енгізіледі», – делінген бұйрық жобасында.