Экс-судья Жолмановаға қатысты тергеу аяқталып, іс сотқа жіберілді
Аса ірі көлемдегі алаяқтық жасады деп айыпталған бұрынғы судья Светлана Жолмановаға қатысты қылмыстық іс бойынша сотқа дейінгі тергеп-тексеру аяқталды. Бұл туралы Бас прокуратураның баспасөз қызметі хабарлады.
«Тергеп-тексеру аяқталғаннан кейін қылмыстық іс Қазақстан Республикасы Қылмыстық кодексінің 190-бабы 4-бөлігінің 2) тармағы (аса ірі мөлшердегі алаяқтық) бойынша айыптау актісімен мәні бойынша қарау үшін сотқа жолданды», – делінген баспасөз хабарламасында.
Тергеу мәліметінше, 2021 жылдан 2024 жылға дейінгі кезеңде Светлана Жолманова азаматтардың 1 млрд теңгеден астам қаражатын алаяқтық жолмен иеленген. Бұл қаражатқа мүлік сатып алуға және тендерлік жобаларға қатысуға жәрдемдесетіні айтып сендірген.
Тергеп-тексеру барысында қылмыстық әрекеті әшкереленіп, алаяқтыққа қатысты 48 эпизод анықталған. Прокуратура мәліметінше бұл эпизодтардың барлығы бір іске біріктірілген.
Ескіден келе жатқан оқиға
Светлана Жолманова Алматы қаласы Медеу аудандық сотының судьясы қызметін атқарған кезде, «мүдделі тұлғалардың пайдасына сот шешімдерін шығаруға көмектескен, алаяқтық әрекеттерді жасады» деген күдікке ілінді. 2021 жылы ҰҚК судьяның кабинетінде тінту жүргізіп, 10 мың доллар көлемінде ақша тауып алғаны туралы видео әлеуметтік желіде тарап кетті. Бұл оқиғадан кейін Жоғары сот оны бар мәртебесінен айырды. Ал мамырда Тоқаевтың жарлығымен Жолманова судьялық қызметінен босады.
2024 жылдың қазан айында Жолманованың алаяқтық фактісі бойынша қамауға алынғаны белгілі болды. Қамауға алынған соң бір ай өткенде Жолманова президент Қасым-Жомарт Тоқаевқа үндеу жариялап, өзіне қол салатынын мәлімдеді. Ал өліміне Алматы сотының төрағасы Асқар Смайлов кінәлі болатынын айтты. Экс-судья қарызы көп екенін, қамауда отырған кезде балалары мен анасының қиналып қалғанын, құзырлы органдардың мүлкін тәркілегенін айтып, мұң шаққан.
