Ақмола облысында миллионер Жұманбаевтың кен орнында жұмысшы қаза тапты

Ақмола облысында «Қазақалтын» АҚ-ға тиесілі «Бестөбе» кен орнында шахтада жыныс опырылып 1985 жылы туған кенші қаза тапқан. Оқиға туралы ақпарат бүгін шығып жатқанымен, жағдай кеше болғаны анықталды. Бұл туралы жергілікті Nayza Kokshe порталы жазды.

Белгілі болғандай, кен орнында 700 метр тереңдікте күмбез бекіткіштерін орнату кезінде жыныс массасы құлаған. Салдарынан бір кенші қаза тауып, тағы бір кенші түрлі жарақаттармен Степногорск қалалық ауруханасына жеткізілген.

Қайғылы оқиғаның себептерін анықтау үшін арнайы комиссия құрылып, оның құрамына өңірдің еңбек инспекциясы мамандары да кіргені хабарланды.

Ақмола облысының полиция департаменті еңбек жағдайындағы қазаға байланысты қылмыстық іс қозғаған.

«Бестөбе» кен орны «Қазақалтын» ЖШС-ға тиесілі, ол өз кезегінде «АК Алтыналмас» АҚ-ның еншілес компаниясы. Қазақстандағы ірі алтын өндіруші компаниялардың бірі болып саналатын бұл кәсіпорынның 67,5% акциясы Gouden Reserves B.V.-ге, ал 22,5% акциясы миллионер Владимир Жұманбаевқа тиесілі.

Кеше «Қазақмыс» компаниялар тобына қарасты Ұлытау облысындағы Шығыс-Жезқазған кенішінде жұмысшы қаза тапқан. Корпорация мәліметінше, 1994 жылғы жұмысшы жүк оқпаны алаңындағы саңылауға құлап кеткен.