Қазақстанда жүргізуші куәлігін қалай тез және оңай алуға болады

Қазақстанда жүргізуші куәлігін алу – көлік жүргізгісі келетін әр адам үшін міндетті болып есептеледі. Егер дұрыс дайындалсаңыз, оны жылдам әрі қиындықсыз рәсімдеуге болады.

Алдымен, сізге қай санаттағы жүргізуші куәлігі қажет екенін анықтау керек. Жеңіл автокөлікті басқару үшін B санаты, мотоциклдер үшін A санаты, жүк көліктері мен автобустар үшін C және D санаттары қажет.

Оқу басталар алдында қандай көлік құралын басқарғыңыз келетінін анықтау қажет

Атап айтқанда:

• A санаты – мотоциклдер
• B санаты – жеңіл автокөліктер
• C санаты – жүк көліктері
• D санаты – автобустар

Келесі қадам қандай?

Келесісі негізгі талаптарға сай болу. Болашақ жүргізуші 18 жасқа толуы, медициналық тексеруден өтуі, автомектепті аяқтауы, ЖҚЕ (жол қозғалысы ережелері) бойынша теориялық емтихан тапсыруы және тәжірибелік (көлік жүргізу) емтиханын сәтті өтуі қажет.

Автомектепте оқу – міндетті кезең

Оқу орнын таңдағанда оның лицензиясы, оқушылардың пікірлері, автопарк жағдайы және сабақ кестесінің ыңғайлылығы ескерілуі керек. Орташа оқу мерзімі 2–3 ай, бірақ жеделдетілген курстар арқылы бағдарламаны 1–1,5 айда аяқтауға болады.

Медициналық тексеруден өту де маңызды

Адамның көру қабілеті, жалпы денсаулық жағдайы, сондай-ақ психолог пен наркологтың қорытындысы тексеріледі. Медициналық анықтаманы мемлекеттік немесе жеке медициналық орталықтардан алуға болады, оның құны 3000–8000 теңге аралығында.

Теориялық емтихан компьютерлік тест түрінде өтеді. Онда 40 сұраққа 40 минут ішінде жауап беру керек. Тапсыру үшін кемінде 34 дұрыс жауап қажет. Егер емтиханнан өте алмасаңыз, 7 күннен кейін қайта тапсыруға болады. Дайындықты «Азаматтарға арналған үкімет» НАО ресми сайтындағы онлайн-тестер арқылы жүргізуге болады.

Тәжірибелік емтихан (көлік жүргізу) автодромда өтеді. Онда келесі негізгі дағдылар тексеріледі: жүргізуді бастау, түзу жүру, шектеулі кеңістікте бұрылу, автотұраққа қою және жол қиылыстарынан өту. Егер сынақтан өте алмасаңыз бір аптадан кейін қайта тапсыруға болады.

Емтихандарды сәтті тапсырғаннан кейін, жүргізуші куәлігін кез келген ХҚКО немесе арнайы ХҚКО-дан алуға болады. Ол үшін қажет құжаттар:

• Жеке куәлік
• Автомектепті аяқтағаны туралы сертификат
• Медициналық анықтама
• Мемлекеттік баж төлеу түбіртегі (2025 жылы 4 312 теңге, яғни 1,25 айлық есептік көрсеткіш.

Жүргізуші куәлігін тезірек алу үшін не істеуге болады?

Ол үшін:

• Жеделдетілген курстарға жазылу
• Теориялық емтиханға онлайн-дайындық тесттерін қолдану
• Құжаттарды алдын ала жинап, арнайы ХҚКО-ға жүгіну

Егер барлық қадамды дұрыс орындап, алдын ала дайындалсаңыз, жүргізуші куәлігін алу процесі жылдам әрі жеңіл өтеді.

Қазақстанда жүргізуші куәлігін алу тәртібімен қатар, бірнеше маңызды жайттарды білу маңызды

Бірінші, экстерн түрде оқу – Қазақстанда авто-мектепте оқыту міндетті, бірақ кейбір санаттағы жүргізушілер (мысалы, басқа санаттағы жүргізуші куәлігі барлар) жеделдетілген курстардан өте алады.

Екінші, электрондық қызметтер – емтихан тапсыруға өтініш беру және Арнайы ХҚКО-дағы кезекті egov.kz порталы немесе Kaspi.kz қосымшасы арқылы қадағалауға болады.

Үшінші, автоматтандырылған емтихан – теориялық емтихан компьютерде өтеді, ал практикалық бөлігі қателерді автоматты түрде тіркейтін алаңда жүргізілуі мүмкін.

Төртінші, жүргізуші куәлігінің жарамдылық мерзімі – стандартты мерзім 10 жыл, содан кейін оны жаңарту үшін медициналық тексерістен өтіп, egov.kz порталы немесе Арнайы ХҚКО арқылы өтініш беру қажет.

Бесінші, халықаралық жүргізуші куәлігі – шетелде көлік жүргізу жоспарланса, Қазақстанда халықаралық жүргізуші куәлігін алуға болады. Ол көптеген елдерде жарамды.

Алтыншы, емтиханды қайта тапсыру – егер емтиханнан өте алмасаңыз, оны 7 күннен кейін қайта тапсыруға болады. Тапсыру мүмкіндігі шектеусіз, бірақ теориялық емтиханның әрбір қайта тапсырылуы үшін мемлекеттік баж төленеді.

Жетінші, тегін өзгерткенде куәлікті ауыстыру – жеке деректер өзгерген жағдайда жүргізуші куәлігін 10 жұмыс күні ішінде ауыстыру қажет.

Еске сала кетсек, Қазақстанда депутаттар жүргізуші куәлігін алу тәртібін қатаңдатуды ұсынған болатын. Халық қалаулылары әлемнің көптеген елдерінде жүргізуші куәлігін алу қиын екенін айтады.