Lifestyle

Михаил Шайдоров әлем чемпионатының күміс жүлдегері атанды (видео)

Михаил Шайдоров алғаш рет әлем чемпионатының жүлдесіне ие болды / фото: REUTERS

Қазақстандық мәнерлеп сырғанаушы Михаил Шайдоров әлем чемпионатында екінші орынға көтеріліп, марқұм Денис Тен мен Элизабет Тұрсынбаеваның жетістігін қайталады.

Ол АҚШ-тың Бостон қаласында өткен әлем чемпионатында 287,47 ұпай жинады. Осылайша Шайдаров алғаш рет әлем біріншілігінің жүлдегері атанды.

«Маусым өте күрделі, бірақ жемісті болды. Юма мен Илья секілді спортшылармен бірге тұғырға көтерілгеніме қуаныштымын. Әлі де алға ұмтыла беремін», – деді Шайдоров.

Бірінші орынға америкалық атлет Илья Малинин көтерілді (318,56 ұпай). Жапон спортшысы Юма Кагияма қола жүлдені місе тұтты (278,19 ұпай).

Бұған дейін әлем чемпионатының күміс жүлдесін Денис Тен мен Элизабет Тұрсынбаева жеңіп алған / фото: REUTERS

Михаил Шайдоров мәнерлеп сырғанау спортында әлем чемпионатының күміс жүлдесін жеңіп алған үшінші қазақстандық атлет. 2013 жылы Канаданың Лондон қаласында өткен біріншілікте Денис Тен екінші орынға көтерілген. Ал 2019 жылы Жапонияның Сайтама қаласында өткен чемпионатта Элизабет Тұрсынбаева күміс алған.

Енді 2026 жылғы әлем чемпионатына Қазақстан ерлер арасындағы жарысқа үш спортшы алып бара алады.

Естеріңізге сала кетейік, Михаил Шайдоров жақында ғана Төрт құрлық біріншілігін жеңіп алған.

Mikhail SHAIDOROV (KAZ) | Men Free Skating | ISU World Championships | Boston 2025 | #FigureSkating