Қазақстанда тағы бір қаржы пирамидасының жұмысы тоқтады

Қаржылық мониторинг агенттігі кең ауқымды операция жүргізіп, «Buyers Union» қаржы пирамидасының қызметін тоқтатты. Ұйым тұтынушылық кооператив ретінде жасырын жұмыс істеп келген.

Қаржы пирамидасының иелері салымшылары жылжымайтын мүлік, көлік сатып алуға және Trade in және ReFinance бағдарламаларына қатысып, инвестиция салуға үгіттеген. Тіпті кейбіреуіне жеке тұлғалардың қаражатын тартудан дивидендтер береміз деп менеджер болып жұмыс істеуге де шақырған.

Кооперативке қатысу үшін әр салымшы сақтандыру ретінде ай сайын 30 мың теңге және сатып алынатын мүліктің құнынан 10%-дық жарна төлеуі керек болған. Бірақ екі арада ақша алғаны туралы ешқандай құжаттарға қол қойылмаған.

Жалпы пирамидаға 250-ден астам салымшы тартылып, 300 млн теңгеден астам қаражат салған. Қазір ұйымдастырушылар сот шешімімен екі айға қамауға алынды. Тергеу жүріп жатыр.

Қаржы пирамидалары түрлі ұйымдардың атын жамылып, әртүрлі маркетингтік әдіспен халықты өзіне шақырады. Оның қармағына ілініп қалмас үшін не істеу керек, мына жердегі материалдан оқып шығыңыз.