Жаңалықтар

Алматыда дерматология ғылыми орталығының директоры 4 жылға сотталды

Қазақ дерматология және жұқпалы аурулар ғылыми орталығы
Қазақ дерматология және жұқпалы аурулар ғылыми орталығы директоры сотталды/фото: kursiv.media

Алматыда «Қазақ дерматология және жұқпалы аурулар ғылыми орталығының» директоры сотталды. Бұл туралы Сыбайлас жемқорлыққа қарсы іс-қимыл агенттігі хабарлады.

Іс 2024 жылдың 24 желтоқсанында басталған. Қылмыстық іс бойынша үкім 2025 жылдың 19 наурызында шыққан. Медеу ауданы сотының судьясы Залина Махарадзенің үкімімен орталық директоры Бауыржан Байсеркин 4 жылға сотталды. Оның орынбасары болған Асылхан Әбішев те 4 жылға бас бостандығынан айырылды.

Іс аясында «Халықаралық жоғары оқу орнынан кейінгі білім беру институтының» директоры Арай Төлемісова 3 жылға сотталды.

«Байсеркин өзінің орынбасары Әбішевтің көмегімен кәсіпкер Төлемісовадан медициналық қызметкерлердің біліктілігін арттыру жөніндегі консорциум шарты шеңберінде жұмыстар мен қызметтерді кедергісіз орындағаны үшін 5 млн теңге сомасында пара алғаны үшін кінәлі деп танылды», – деп хабарлады агенттік.

Сотталғандар мемлекеттік қызметте және квазимемлекеттік мекемелерде қызмет атқару құқығынан өмір бойы айырылды.

Сот актісі заңды күшіне енген жоқ.

Сондай-ақ сот кабинетіндегі ақпаратқа сәйкес, қылмыстық іс аясында 31 наурызда екі апелляциялық шағым түскен.