Қаскелеңде айыпталушы сот ғимаратынан қашып кетті

Қаскелеңде сотталушы сот ғимаратынан қашып кетті. Бұл жағдай Алматы облысының қылмыстық істер жөніндегі мамандандырылған ауданаралық сотында болған. Ақпаратты KursivMedia тілшісіне Алматы облысы полициясының баспасөз қызметі растады.

«Қамауға алынған М.-нің қашып кету фактісі бойынша қылмыстық іс қозғалды. Ер адамды ұстау үшін іс-шаралар кешені қабылданып жатыр», – делінген полиция таратқан ақпаратта.

Сондай-ақ болған оқиғаның мән-жайын анықтау үшін қызметтік тексеріс тағайындалған.

«Азаматтардан тыныштық сақтауды және іздеуде жүрген адамның орналасқан жері туралы ақпарат болған жағдайда 102 телефонына дереу хабарлауды сұраймыз», – деп мәлімдеді Алматы облысы полициясы.