Жаңбыр, тұман мен екпінді жел: сәуірде ауа райы қалай құбылады
Сәуір айында Қазақстан аумағында ауа температурасы біртіндеп жоғарылап, табиғаттың толық көктемге бет алғанын сезінуге болады.
«Қазгидромет» мәліметтеріне сүйенсек, айдың алғашқы онкүндігінде еліміздің солтүстігінде тәуліктік орташа температура 0°С-тан жоғары, ал оңтүстікте бұл көрсеткіш +10°С-тан асады.
Алғашқы онкүндік: қар мен жаңбыр қатар жүреді
Сәуірдің бірінші онкүндігінде елдің солтүстік бөлігінде түнде жауын-шашын күтіледі. Кей жерлерде жаңбыр қарға ұласып, көктайғақ болуы мүмкін. Күндіз жаңбыр жауады. Ал оңтүстікте найзағайлы жаңбыр болжанып отыр.
Аймақтар бойынша ауа температурасына тоқталсақ:
- Батыс өңірлерде түнде ауа температурасы +8…+13°С-тан -3…+8°С-қа дейін, күндіз +18…+25°С-тан +11…+16°С-қа дейін ауытқиды. Кейбір күндері оңтүстік-батыста +20…+28°С-қа дейін жылынуы мүмкін.
- Солтүстік-батыс, солтүстік, орталық және шығыс өңірлерде түнгі температура -5…+5°С пен +3…+8°С аралығында, күндіз +8…+13°С-тен +15…+22°С-қа дейін жетеді.
- Оңтүстікте түнде +2…+10°С-тен +10…+15°С-қа дейін, күндіз +18…+25°С пен +25…+30°С аралығында жылы болады.
- Оңтүстік-шығыста түнгі ауа температурасы -5…+5°С пен +7…+12°С аралығында, күндіз +12…+20°С-тан +18…+27°С-қа дейін өзгереді.
Сәуірдің екінші онкүндігінде елдің солтүстік жартысында жаңбыр мен аздаған қар болуы мүмкін. Ал үшінші онкүндікте негізінен жаңбыр жауады.
Республика аумағында түнгі температура +5…+13°С-тан -3…+5°С-қа дейін, күндіз +15…+25°С-тен +8…+13°С-қа дейін ауды.
Оңтүстік пен батыс өңірлерде күндіз ауа +23…+32°С-қа дейін қызуы ықтимал. Дегенмен кейбір күндері салқындап, температура +10…+18°С шамасында болуы мүмкін.
