Семейде баланы соққыға жыққан жасөспірімдердің ата-аналары жауапқа тартылды
Абай облысының кәмелетке толмағандардың істері жөніндегі мамандандырылған ауданаралық соты Семей қаласында жасөспірімдердің қатысуымен болған оқиғаларға байланысты бірнеше әкімшілік және азаматтық істі қарады.
Ата-аналарға әкімшілік жаза тағайындалды
Қаланың қоғамдық резонанс тудырған оқиғаларының бірі – бір топ жасөспірімнің баланы соққыға жыққаны еді. Осы оқиға бойынша сот балалардың ата-аналарын Қазақстан Республикасы Әкімшілік құқық бұзушылық туралы кодексінің 127-бабына сәйкес, балаларды тәрбиелеу жөніндегі міндеттерін тиісінше орындамағаны үшін кінәлі деп таныды.
Сот қаулысымен:
- Азамат Л.А. 5 тәулікке әкімшілік қамауға алынды;
- Азаматтар Д.М., М.Т., Т.А. және А.Қ.-ға әрқайсысына 78 640 теңгеден айыппұл салынды.
Құқық бұзған жасөспірімдер арнайы мектеп-интернатқа жіберілді
Бұған қоса, сот девиантты мінез-құлықты балаларға арналған мамандандырылған білім беру ұйымдарына бірнеше жасөспірімді жіберу туралы азаматтық істерді қарады.
Сот шешіміне сәйкес:
- Л.М. (2011 ж.т.) екі қылмыстық құқық бұзушылық жасағаны үшін (қылмыстық жауапкершілікке жасы жетпегендіктен тергеу тоқтатылған), 6 ай мерзімге облыстық арнайы мектеп-интернатқа жіберілді;
- Ш.Е. (2008 ж.т.) қоғамдық тәртіпті жүйелі түрде бұзғаны және оқудан жалтарғаны үшін, 4 айға Серебрянск қаласындағы арнайы мектепке орналастырылды;
- М.А. (2012 ж.т.) да бірнеше мәрте құқық бұзғаны үшін 4 айға арнайы оқу мекемесіне жіберілді.
Барлық сот шешімдері кәмелетке толмағандар арасындағы құқық бұзушылықтардың алдын алу, олардың тәртібін түзету және ата-аналарға жауапкершілікті еске салу мақсатында қабылданды. Сот бұл істердің қоғамдық тәрбиелік мәні бар екенін атап өтті.
