Кез келген сала сияқты, саяхатта да ынта мен талпыныс — ең маңызды алғышарттардың бірі. Бірақ қанша жерден саяхатқа құштар болсаң да, ақшасыз алысқа ұзап кете алмайсың. Көп саяхаттауға талаптанғанмен, ақшаның аздығы ғана қолбайлау болып тұрса, қамықпаңыз. Бүгінгі мақаламызда үнемді саяхаттың қыр-сырын іздеп жүрген оқырмандарымызға арзан саяхаттаудың бірнеше әдісін жинап қойдық. Оқып шығыңыз да, жаңа елге сөмке жинай беріңіз.
Ұшақ билетін тиімді алу
Арзан саяхат ұшақ билеттерінен басталады. Билетті google flights, skyscanner немесе aviasales арқылы қараймыз. Аталған іздестіру жүйелерінде:
- Жедел билеттер (hot tickets) — ұшатын қалаңызды таңдап, hot tickets батырмасын бассаңыз, жақын күндердегі үлкен жеңілдікпен тұрған билеттер шығады. Әдетте мұндай бағалар өте арзан болады, сізге бар болғаны тез шешім қабылдап, ұшып кету керек.
- Бір ай ішіндегі ең арзан бағалар — ұшатын және баратын еліңізді таңдап, уақытына сәуір деп бір айды тұтас белгілесеңіз болады. Сонда көрсетілген бағыт бойынша таңдалған айдағы ең арзан билеттер шығады. Фильтрден ең арзан бағалар немесе тікелей рейс таңдап қойсаңыз, сізге қажет билеттерді бірінші көрсетеді.
- Кез келген елге батырмасы — ұшатын қалаңыздан кез келген жерге ұшу деген функцияны таңдасаңыз, ұшу нүктесінен қай бағытқа ең арзан билеттер бары шығады. Нақты бір елге емес, кез келген арзан бағытқа саяхаттауға дайын адамдарға таптырмас мүмкіндік!
Тағы бірнеше кеңес:
Билеттерді авиакомпания сайтынан алу керек. Іздестіру жүйелері арқылы сатып алуға да болады. Бірақ әдетте билетті арадағы делдал компаниялар сатады, олардың өз комиссиясы бар. Мұндай сайттардың көбі тұрақсыз, ақша төлерде билет бағасы күрт өзгеріп кетуі немесе сізге қосымша қызметтер қосып жіберуі мүмкін.
Сондықтан айталық, Air Asia рейсіне тиімді билет тапсаңыз, әуелі сол авиакомпания сайтына тіркеліп алыңыз. Содан кейін іздестіру жүйесінен көрген билетті авиакомпания сайтынан сатып аласыз. Көп компанияда бонус жүйесі бар, соған қосылып алыңыз. Сонда әр билет ақысынан ұпай жинайсыз, кейін жиналған қорға жаңа билет сатып алуға немесе бизнес класқа ауысуға болады.
Билеттерді сапардан 2-3 ай бұрын аламыз. Бірақ әуе компаниялары билет бағасын үнемі өзгертіп отырады, бір рейстегі қатар орындарды әртүрлі бағада сатады. Кейде 2 апта бұрын алған билет 2 ай бұрын алынған билеттен арзан болуы мүмкін. Бірақ ондай сәттілік ілуде бір болады, оған үміт артпай, алдын-ала жоспарлаңыз.
Отандық және халықаралық авиакомпаниялардың әлеуметтік желідегі парақшаларына жазылып алыңыз. Әр елде ұлттық мереке болғанда, Айт, Рождество, Жаңа жыл, Қара жұма (Black Friday) кезінде халықаралық әуе компанияларының көбінде үлкен жеңілдіктер болады. Соларды жіберіп алмай, хабар шыққан кезде бірден сатып алыңыз. Жеңілдіктегі билеттер тез таусылып кетеді, әрі сайтқа көп адам кіргеннен, көбіне техникалық ақаулар болып, істемей қалады.
Әуе компанияларының жаңалықтарынан құлағдар болып отырудың тағы бір артықшылығы — жаңа бағыттар жайлы білу. Мәселен, жақында Scat компаниясы Оңтүстік Кореяға рейс ашты. Осындай жаңалық шыққанда, бірден сол бағыт ашылатын кезден бастап билет қарасаңыз, алғашқылар тиімді бағаға үлгеруі мүмкін. Кейін рейстер тұрақталғанда, оның бағасы міндетті түрде көтеріледі.
Тұратын жерге ақша үнемдеу
Билет сияқты қонақүйлерді де мейлінше ерте броньдаған дұрыс. Авиабилет бағасы ұшатын күн жақындаған сайын қалай көтерілсе, қонақ үй бағасы да солай өсе береді. Қонақ үйлерді booking, agoda, airbnb сайттарынан іздейміз. Аталған сайттарда бонус бағдарламасы, әртүрлі жеңілдік бойынша ұсыныстар бар. Бәріне қосылып алыңыз.
Көп елде қонақүйді тікелей броньдау арзанырақ түседі. Өйткені booking сияқты платформалар комиссия алады. Google картадан өзіңізге ұнаған локациядан қонақ үйлер тауып, сол жерде көрсетілген мессенджерлер арқылы байланысып, тікелей броньдау бағасын сұраңыз. Арзан шықса, солай алған дұрыс.
Сайттағы миллион қонақ үйді қарап шаршамас үшін бірден фильтр бөліміне барып, өз талғамыңыз бойынша критерийлер енгізіп шығыңыз. Жеке жуынатын бөлме, таңғы ас, рейтингі 8-ден жоғары деген сияқты. Әрі қонақ үйлерді ең арзанынан бастап көрсетуді сұрасаңыз, тиімді бағадағы ұсыныстар бірінші шығады.
Agoda мен Airbnb-де қонақүй мен пәтерге алдын-ала төлем жасап қою керек. Тұратын жер сипатталған талаптарға сай келмесе, ақшаны қайтаруға, әртүрлі төтенше жағдайларда, пәтер иесі аз уақыт қалғанда, броньді алып тастаса, airbnb техқолдауына хабарласып, тіпті, өтемақы өндіріп алуға болады. Бірақ бұған уақытыңыз бен жүйкеңізді аясаңыз, бөлме сипаттамасын, барлық пікірді мұқият оқыңыз. Қонақүйдің орналасқан жерін картадан қарап, қала ішінде жүріп-тұруға ыңғайлы болғанына назар аударыңыз. Үлкен қалаларда, туристік орындарда тұратын жердің орталыққа жақын болғаны жақсы. Тыныш ұйықтау үшін жақын жерде бар, түнгі клуб бар-жоғы да маңызды.
Ең жақсысы, free cancellation немесе ақшаны барған соң төлеу опциясы бар қонақүйлер. Бұл бөлмені өз көзіңізбен көрген соң ғана төлем жасауға мүмкіндік береді. Жоспарыңыз өзгерсе, артық төлемсіз броньді алып тастауға болады. Өкінішке қарай, көп жақсы қонақ үйде мұндай опциялар жоқ, олар алдын-ала төлем талап етеді. Ал жақсы, бірақ жоғарыда аталған мүмкіндіктері бар жерлер тез сатылып кетеді.
Шетелде ең арзан нұсқалардың бірі — хостелдер. Тек хостелдерге арналған қосымша — Hostelworld. Осы қосымшаны жүктеп, тіркеліп алсаңыз, кез келген елден жақсы хостелдер табуға болады.
Шетелде тегін тұрғыңыз келсе, Couchsurfing қосымшасын пайдаланып көріңіз. Бұл қосымша жергілікті тұрғындардың үйіне қонақ болуға мүмкіндік береді. Қосымшаға тіркелмес бұрын интернеттен couchsurfer-лер тәжірибесін оқып, жоба қалай жұмыс істейтінін түсініп алыңыз. Мұнда қауіпсіздік мәселесі — толықтай өз жауапкершілігіңіз. Хостты (үйіне қонақ қылатын адам) мұқият таңдаған жөн.
Кейде 100 жақсы пікірі бар адам да қауіпсіз болмауы мүмкін екенін ескертеміз!
Тегін еңбек = тегін үй
Арзан саяхаттаудың тағы бір әдісі — ерікті болу (volunteering).
Әлемде көп қонақүй, мектеп, орталықтар, мейрамхана сияқты түрлі бизнес субъектілері саяхатшыларға тегін тұратын жер мен тамақ ұсынады. Орнына 2 аптадан 6 айға дейінгі аралықта тегін жұмыс істеуіңіз керек. Мұндай ұсыныстарды workaway, worldpackers сайттарынан табуға болады. Сайтқа тіркелу үшін ақылы жазылу керек.
Мәселен, Испанияда бармен, Италияда даяшы, Австралияда хостел ресепшнінде жұмыс істей аласыз. Йогадан сабақ беру, серферлерді суретке түсіру, балаларға ағылшын оқыту, сальсадан оқытушы болу сияқты небір қызық позициялар да бар. Ең бастысы, бойыңызда тегін тұратын жер мен тамаққа айырбастайтын дағды болуы керек.
Жұмыс уақыты мен саяхатшыға не нәрсе тегін берілетіні волонтерлік бағдарлама шартына байланысты. Кей орындарда тұратын жер мен тамақтан бөлек, әртүрлі турларға жеңілдік берілуі мүмкін. Кей бағдарламада күнделікті тамаққа ақша төлеуге тура келеді. Өмір сүру жағдайы да әр жерде әртүрлі. Сондықтан тағы да мұқият оқып, ұсынылған ақпаратпен түгел танысып шығыңыз.
