Алматы – Талғар трассасы төрт жолаққа дейін кеңейтіледі

ҚазАвтоЖол «Алматы – Талғар – Бәйдібек би» автожолының күрделі жөндеу жобасы бойынша қоғамдық тыңдау өткенін мәлім етті.

Мән-жайы

Республикалық маңызы бар «Алматы – Талғар – Бәйдібек би» автожолының Алматы – ҮАААЖ (13–21 км) учаскесінде күрделі жөндеу жобасының жобалық-сметалық құжаттарын әзірлеу бойынша жолға жақын орналасқан елдімекен тұрғындарына тыңдау өткізілген.

Жол кеңейтіледі

ҚазАвтоЖол жергілікті тұрғындардың өтініштерін ескере отырып, жоба аясында жүріс бөлігін екі жолақтан төрт жолаққа дейін кеңейту мәселесі қарастырылғанын хабарлады.

«Аталған жобаны іске асыру автожолдың өткізу қабілетін айтарлықтай арттыруға, жолдағы кептелістерді азайтуға және жол учаскесінің пайдалану жағдайын жақсартуға мүмкіндік береді» дейді мекемедегілер.

Қазіргі уақытта, ҮАААЖ қосылатын Сайын, Абай даңғылы, Тілендиев және Солтүстік айналма жолында құрылыс жүріп жатыр.