Жол-көлік оқиғасына түскен жағдайда не істеу керек

Жарияланды
General news бөлімінің тілшісі
Жол-көлік оқиғасына түскен жағдайда не істеу керек
Жол-көлік оқиғасына түскен жағдайда не істеу керек/Фото: shutterstock

Жол-көлік оқиғасына кез келген жүргізуші тап болуы мүмкін. Әсіресе, үлкен қалаларда темір тұлпар иелері мұндайға жиі ұшырайды. Осындай жағдайларда дұрыс әрекет ету аса маңызды.

Ең алдымен сабыр сақтаңыз

Дүрлікпеңіз, үрейге бой алдырмаңыз. Дүрлігу жағдайды бағамдауға кесірін тигізіп, дұрыс шешім қабылдауға кедергі келтіруі мүмкін. Тіпті жол көлік оқиғасы сіздің кінәңізден болса да, салқындандылық сақтау маңызды.

Апаттық белгілерді қосыңыз

Көлікті тоқтатып, авариялық жарықты қосыңыз. Басқа жүргізушілерді ескерту үшін жолға қауіпсіз қашықтықта апаттық белгіні (үшбұрыш) қойыңыз.

Жарақат алған адам бар-жоғын тексеріңіз

Жол-көлік оқиғасына түскен адамдардың амандығына көз жеткізіңіз. Егер жарақат алғандар болса, алғашқы медициналық көмек көрсетіп, дереу жедел жәрдем шақырыңыз. Операторға зардап шеккендер саны мен жарақаттың сипатын нақтылап айтыңыз.

Ештеңені қозғамаңыз

Жол-көлік оқиғасы кезінде сынған фараның әйнектері, бампер бөліктері секілді зақымданған заттарды қозғамаңыз. Бұл тергеу кезінде қажет болады. Заттардың орнын өзгерту кінәліні анықтауды қиындатуы мүмкін.

Суретке түсіріңіз

Оқиға орнын түрлі ракурстан суретке түсіріңіз. Көліктердің зақымданған жерлерін, жол белгілерін, жол таңбаларын және басқа да маңызды детальдердің суреті маңызды дәлел болуы мүмкін.

Еурохаттама толтырыңыз немесе полиция шақырыңыз

Егер жол-көлік оқиғасына түскен жүргізушілер кінәлі тарап туралы ортақ пікірге келіп, біріне-бірі қояр талап-тілегі болмаса, еурохаттама толтыруға болады. Бұл полиция қызметкерін күтетін уақытты үнемдеп, ресми құжаттарды рәсімдеуді жылдамдатады. Ескерерлігі, еурохаттама рәсімдерде ЖКО-дан адам зардап шекпеген болуы керек. Оқиғаның тек екі қатысушысы болуға тиіс. Үш немесе одан көп көлік соқтығысса, онда жарамайды. Көлік құралдары міндетті сақтандыру полисі арқылы сақтандырылған болуы шарт.

Жүргізушілер өзара келіскен жағдайда

Көлікке айтарлықтай залал келмеген жағдайда жүргізушілер өзара келісіп жатады. Мұның артықшылығы, полицияны сағаттап күтудің қажеті жоқ. Зардап шегуші тарап сот болғанын, сақтандыру компаниясы ақша бөлгенін күтіп жүрмейді. Кейде сот процестері бірнеше аптаға, тіпті айға созылады. Ол аралықта көліктің бүлінген жеріне тиісуге болмайды.

Ұсақ ЖКО жағдайларында өзара келісу кінәлі тарап үшін де тиімді. ЖКО жасағаны үшін айыппұл төлемейді, сотқа қатысып, уақытын құртпайды. Жүргізуші санаты төмендеп, сақтандыру полисінің құны қымбаттап кетпейді.

Алайда өзара келіскен жағдайда шығынды өтеп, қол алысқаннан бөлек, бір-біріне арыз-шағымы жоқ екенін растап алған дұрыс. Өйткені жәбірленуші тарап, ақшаны алып, кәнілі адам оқиға орнынан қашып кетті деп арызданған жағдайлар ұшырасқан. Сондықтан өзара келісімді қолхат болмаса, фото-видео түрінде фиксация жасап алу керек.

Сондай-ақ оқыңыз