Қашаған, Қарашығанақ, Жаңаөзенде газ өңдеу зауыттарын салу Ақордада талқыланды

Қазақстан президент Қасым-Жомарт Тоқаев елдің Энергетика министрі Ерлан Ақкенженовті қабылдады. Бұл туралы Ақорда хабарлайды.

Ресми мәліметке қарағанда, кездесуде отын-энергетика кешенін дамыту, мұнай өңдеу зауыттарының тұрақты жұмысы, мұнай өңдеу саласын 2040 жылға дейін дамыту тұжырымдамасын әзірлеу мәселелері талқыланған. Бұған қоса биыл мұнай өңдеу көлемін 17,6 млн тоннаға жеткізу жолдары да сөз болған.

Сонымен бірге Ақордадағы кездесуде Қашаған, Қарашығанақ және Жаңаөзенде жаңа газ өңдеу зауыттарын салу, «Бейнеу – Бозой – Шымкент» магистральді газ құбырының екінші желісін және «Талдықорған – Үшарал» газ құбырын жүргізу жобалары талқыланған. 2035 жылға қарай қуаты 26 ГВт-тан асатын жаңа генерациялау кешендерін іске қосу жобасы да айтылған.

Ақорданың мәліметінше, президент Энергетика министріне бірнеше тапсырма берді:

• Мұнай-газ, мұнай-газ химиясы және электр энергетикасы салаларындағы инфрақұрылымдық жобаларды уақтылы және сапалы жүзеге асыру.
• Энергетикалық қауіпсіздік сақтау, тұрғындар мен өндірістік нысандарды қуат көзімен тұрақты қамтамасыз ету.
• Инвестициялық климатты жақсарту және геологиялық барлауға стратегиялық инвесторларды тарту.

Естеріңізге сала кетейік, Ерлан Ақкенженов энергетика министрлігінің басшысы қызметіне жақында ғана кірісті. Ол Алмасадам Сәтқалиевтің орнына келді.