Назарбаев мінген Mercedes Benz көлігі тағы да сатылымға шықты

Жарияланды 2 Сәуір 2025 09:07

Рауан Мутаир

Рауан Мутаир

General News бөлімінің тілшісі rauan.mutairov01@gmail.com
Назарбаев мінген Mersedes көлігі тағы да сатылымға шықты / фото: kolesa.kz

Қазақстанның тұңғыш президенті Нұрсұлтан Назарбаевтың қызметтік көлігі болған Mercedes S-600 көлігі қайтадан сатылымға қойылды. 1993 жылы шығарылған бұл көлікке қойылған баға бұрынғыдай – 222 миллион теңге. Ең қызығы – көліктің жүрісі бар болғаны 38 мың шақырымнан сәл ғана асады.

Kolesa.kz сайтындағы хабарландыруда сатушы бұл көліктің ерекше екенін бірнеше мәрте атап өтеді. Сатушының айтуынша, бұл — арнайы тапсырыспен Германиядағы зауытта мемлекет басшылары үшін құрастырылған брондалған нұсқа.

«Сіздердің алдарыңызда – Қазақстан Республикасының Тұңғыш Президентінің алғашқы көлігі Mercedes 600 SEL (Sonderschutz) GUARD B7. Арнайы тапсырыспен Германияда құрастырылған, мемлекет басшылары үшін жасалған», – делінген хабарландыруда.

Сатушының сөзінше, бұл көлікке орнатылған сыртқы қорғанысы автоматтың оғынан да қорғайды.

Хабарландыруда сондай-ақ осыған ұқсас Mercedes S600 Guard көлігі кезінде Грузияның экс-президенті Эдуард Шеварднадзенің өмірін сақтап қалғаны айтылған. Ал Ресей президенті Владимир Путинге тиесілі дәл осындай көлік біршама жыл бұрын 1,3 миллион еуроға сатылған екен.

Айта кетейік, бұл көлік бұған дейін де сатылымға шыққан. Ол кезде де сатушы оны 222 миллион теңгеге бағалаған.

Сондай-ақ, бұған дейін Kursiv Media әлем президенттері қандай көлік мінетіндерін жазған еді.

Сондай-ақ оқыңыз