Шәууәл айындағы алты күндік оразаны қалай ұстайды

Рамазан айынан кейін келетін Шәууәл айы мұсылмандар үшін тағы бір игілікке толы кезең. Бұл айда алты күн нәпіл ораза тұту – Мұхаммед пайғамбардың сүннеті. Бұл оразаның сауабы жайында хадистерде кеңінен айтылған.

Алты күндік ораза қалай ұсталады?

ҚМБД жарияланған мәліметтерене сүйенсек, Шәууәл айының алты күндік оразасы Рамазаннан кейін бірден, яғни Ораза айт мейрамы өткен соң бастауға болады. Бұл оразаны мынадай жолдармен ұстауға болады:

• Үзбей қатарынан алты күн ұстау;
• Үзіліспен, яғни бір ай ішінде кез келген алты күнді таңдап ұстау.

Оразаны қалай ұстайтыны – адамның өз еркінде. Ең бастысы – Шәууәл айы шықпай тұрып алты күнді толық ұстау. Сондай-ақ Рамазан айында оразасы қаза болған күндер болса, қарызды өтеп барып, Шәyуәл айынында ауыз бекіту абзал.

Шәууәл айының оразасының сауабы қандай?

ҚМДБ мәліметінше, Шәуyәл айындағы алты күндік ораза – Рамазан оразасымен бірге тұтылғанда, толық бір жылдық нәпіл ораза ұстағанның сауабына тең болады. Ғалымдар бұл сауаптың мәнін түсіндіргенде, Рамазан – 10 есе сауаппен есептеліп, 30 күн 300 күнге тең болады, ал Шәууәлдің алты күні – тағы 60 күнге, яғни бір жылға толықтай жетеді дейді.

Еске сала кетейік, бұған дейін Қазақстан мұсылмандары діни басқармасы «Биткоин» криптовалютасын пайдалану туралы үкім шығарды.